تابع نصائح عامه عند عمل اي اجراء حكومي كاجراءات التجنيد مثلا

|


تابع النصائح:

2- لازم وانت بتعمل اجراءات تبقى ماسك دوسيه او اكلسير او ملف او اي شنطه صغيره حاطط فيها كل الورق المتعلق بالاجراء الحكومي اللي انت بتعمله حتى لو كان الورق اللي انت جايبه ليه علاقه بعيده بالاجراء الحكومي
كده كده مش حتخسر حاجه خصوصا لو انت كنت مصور نسخه من اي ورقه معاك
وده بجد متتخيلوش ده مفيد اد ايه

انا حضرب لكم مثال بسيط حصل لي شخصيا عشان تفهموا قصدي :

وانا جاي ادفع ال10 جنيه ونص للموظف عشان استلم القيد العائلي اخيرا ( تعتبر اخر خطوه خاااالص ) والمفروض انها خطوة مش محتاجه اي ورق بل مجرد بطاقتي الشخصيه عشان يتاكدوا من هويتي وادفع الفلوس والمفروض كده يبقى خلاااااص

لكن اللي حصل ان المفروض القيد العائلي يكون متدبس فيه صورة من بطاقه الاب ( ودي انا كنت اديتهالهم من زمان وقت تقديم الطلب للحصول على القيد العائلي ) لكني فوجئت ان صورة البطاقه ضاعت منهم ومش متدبسه مع القيد العائلي

فطبعا ( برغم ان الغلطه منهم هما مش مني انا ) اضطريت اني اروح البيت واروح لوالدي واخد البطاقه واصورها وارجع تاني ليهم واديهم الصورة

طيب تخيلوا لو انا كنت وقتها معايا صورة البطاقه بتاعه والدي ؟

كان زماني ساعتها اديتهالهم وخلصت الاجراء بسرعه ويسر من غير ما اضطر اروح واجي تاني وكده صح ولا لأ ؟

3- دايما بالذات يكون معاكم كام صورة شخصيه وكام صورة من بطاقتك ويا سلام كمان لو معاك صور بطايق العائله كلها كمان
بجد حيساعدكم كتير الموضوع ده

4- قبل ما تعمل اي اجراء حكومي دايما حاول تسأل اي حد كان عمله قبل كده وتجمع معلومات عن الورق المطلوب وكده عشان تنجز نفسك

5- يا ريت دايما تحاول تبتدي في اي اجراء حكومي بدري من صباحيه ربنا عشان متضطرش تقف في طوابير طويله او تضطر تدفع فلوس عشان تخلص نفسك

6- تكون جايب معاك دايما قلم ازرق جاف عشان دايما بيخلوك تملأ شويه اوراق وكده

7- متحاولش ابدا تتخانق مع احد الوظفين الحكوميين صدقوني وعن تجربه وخبرة الخناق عمررررررررره محيوصلك لحاجه واوعى تتخيل ان الموظف او الموظفه حيخاف منك بل بالعكس حتلاقيه مستقصدك ومش حيخلصك في سنتك

8- لما تكون محتار وعايز تسأل سؤال يبقى اسأل بسسسسسسسس الناس المختصه واوعى تلتفت لكلام الناس اللي واقفين معاك في الطابور عشان صدقوني لو سمعت كلامهم حتروح في داهيه
الشعب المصري اكتر شعب يحب يفتي لأسف

9- لما تحب تسأل عن حاجه متسألش موظف واحد وبس لكن لازم تسأل اتنين على الاقل عشان احيانا كتيرة بتلاقي موظف يقولك حاجه غلط
اما لأنه مش فاهم وده مش تخصصه او عشان يخلص منك ويزحلقك بالبلدي عشان ينجز نفسه مستغل جهلك بالاجراءات الحكوميه


0 comments:

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB