تجديد رخصه العربيه

|

انا حنتكلم في الموضوع ده عن اجراءات تجديد رخصه العربيه ملاكي بس من غير فحص .. الخطوات دي انا عملتها في مرور طوسون في اسكندريه في 2014

مبدأيا كده عشان تجدد رخصه العربيه الملاكي او اي اجراء في المرور يفضل انك تروح من بدري على الساعه 9 مثلا عشان حتلاقي كل شويه السيستم بيقع و الاجراءات ممكن تطول للأسف ...

اجراءات تجديد رخصه سياره ملاكي كالتالي :

1- بتروح تجيب من كشك التصوير جوه اداره المرور ملف وورقتين كومبيوتر وورقه مخالفات وورقه كده بصراحه معرفش اسمها بالضبط ايه بس الورقه دي هي اللي الموظفه بتكتبلك عليها رقم الكمبيوتر ( او ممكن تستسهل وتقول للي في الكشك انك عايز تجدد رخصه العربيه ملاكي لمده سنه ( او اكتر على حسب انت عايز ايه ) وهو بيديك الورق ده كله من غير ما تشغل دماغك بس المهم انك تسيب الورق ده كله فاضي ومتكتبش فيه حاجه ) ويفضل بالمرة تصور البطاقه ورخصه العربيه والسواقه او التوكيل لو مكانتش عربيتك كل واحده منهم نسختين احتياطي

2- بتروح مبنى المرور وبتطلع رقم الكمبيوتر وده اما في الدور الارضي او الاول علوي على حسب الحروف الموجوده في رخصه العربيه وبيبقى مكتوب في كل دور الحروف المخصصه لكل دور في ورقه ملزوقه على شباك من شبابيك الموظفات

3- بتروح قسم المخالفات وده مثلا في مرور طوسون جوه اداره المرور لكن جنب مبنى المرور نفسه وحتلاقيهم عملو نظام غريب شويه وهو انك بتاخد رقم ولما ييجي رقمك ساعتها بتدخل مبنى المخالفات نفسه بس طبعا بتلاقي كوسه ووسايط  كتير للأسف ودورك بيتأخر اوي وعشان كده يفضل تاخد رقم وتعرف اول واحد واقف على الباب رقمه كام عشان تبقى عارف فاضلك تقريبا اد ايه وبعدها تروح تكمل باقي الاجراءات عشان متعطلش نفسك على الفاضي و بعد كده ترجعلهم وتشوف المخالفات اللي عليك لو كان لا قدر الله عليك مخالفات ( وده مختلف عن السنين اللي فاتت لأنك قبل كده مكنتش بتدخل مبنى المخالفات نفسه الا لو كنت عايز تروح لوكيل النيابه عشان تتظلم ويخففلك المخالفه وكنت بتقف في طابور من بره بتديله الرخصه وورقه المخالفات وبعدها بينده عليك ويديك الورقه مختومه ومثبوت فيها اي مخالفات لو لا قدر الله كانت عندك )

4- بتروح تدفع التأمين وده في مرور طوسون فيه كزا شباك لكزا شركة تأمين جنب اداره المخالفات واختار اي شركة تأمين منهم مش حتفرق كتير

5- بتروح مبنى المرور و بتشتري من الخزنه ملف اصفر ونموذج 251 عشان تجديد سنه واحده ( او اكتر من سنه لو حابب ) والنموذج ده هو الوحيد اللي بتملاه وبتكتب فيه بياناتك وبيانات العربيه زي رقمها مثلا .. الخ وبعدها بتطلع عند الشباك اللي اخدت منه رقم الكمبيوتر وبيبقى فيه عسكري جوه بتديله الرخصه عشان يطلعلك الملف وبيديه لنفس الموظفه اللي ادتلك رقم الكمبيوتر وبتستنى لحد ما تنده عليك فبتديها الورق كله اللي معاك وبعدها هي بتكتبلك على ورقه صغيره مبلغ الضريبه اللي المفروض تدفعه

6- بتروح عند الخزنه برضه بس الموظف التاني وبتدفعله فلوس الضريبه وبيديك الايصال وبعدها بترجع عند نفس الموظفه بتديها الايصال وساعتها هي بتوديه لموظفه جنبها بتراجع الورق وبتملالك ورقه الكمبيوتر اللي كنت اشتريتها في الاول خالص وبترجعهالك بعد ما بتملاها

7- بتروح عند شباك الكمبيوتر وطباعه الرخص ( في طوسون ده بيبقى الشباك بتاع مبنى المرور بس من بره ) وبتديها ورقه الكمبيوتر وبتستنى شويه وبعدها بتنادي عليك فبتوريها البطاقه وتستلم رخصه العربيه الملاكي الجديده والف مبروك  :)

ودي هي كل اجراءات تجديد رخصه سياره ملاكي من غير فحص

وللتبسيط الموقع ده تبع الحكومه الالكترونيه للاستعلام اكتر,والكشف عن المخالفات وخلافه   http://adf.ly/gVAur

0 comments:

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB