الفرق بين الموظف الحكومي وموظف القطاع الخاص

|


اولا انا احب اوضح انا أقصد اوضح الفرق بين الموظف الرخم في القطاع الحكومي والقطاع الخاص

وازاي تتعامل مع كل واحد فيهم

مش كل الموظفين رخمين طبعا وفيه فعلا موظفين كويسين جدا سواء في القطاع الحكومي او القطاع الخاص وان هنا حتكلم عن الموظف الرخم بس مالناش دعوه بالموظفين الكويسين

لكن ايه الفرق في طريقه معاملتك للموظف الرخم الحكومي وموظف القطاع الخاص ؟

اقولك انا يا سيدي :

الموظف الحكومي الرخم :

لازم تفهم من الاخر انه مستبيع ومش هامه حاجه
كده كده هو ساخط على وضعه وعلى مرتبه وعلى وظيفته
وكده كده هو عارف انه بقاله فترة طويله في الشغل ومحدش عنده استعداد انه يمشيه من الشغل حتى لو مأداش وظيفته كويس
يعني من الاخر مش هامه حاجه
كده كده هو بيعمل اللي بيعمله كل يوم وحيقبض مرتبه الضئيل في الاخر
وبالتالي بعض الناس ممكن يتخنقوا من الموظف ده خصوصا لو كان مستفز

لكن بقولهم نصيحه لوجه الله :

اوعى تتخانق مع اي موظف حكومي مهما كان هو رخم او مستفز
متتخيلش ان بزعيقك ده انه حيخاف منك او انه حيمشيك ولا حيعملك اجراءاتك بجد لو كنت متخيل ان ده حيحصل تبقى انت انسان وااااااااااااهم

لو زعقتله بص يا سيدي بقى اللي حيحصل :

عمره ما حيخلصلك اي مصلحه ولا اي ورق ولا عمره ما حيقولك حاجه مفيده ومش حتخلص اي اجراء في حياتك وحيعند معاك
وبدل ماكنت حتستنى يوم حتلاقي نفسك حتستنى يوم واتنين وتلاته

من الاخر :

مالهاش حل غير انك تصبر وتقول في سرك لو كان ليك عند الكلب حاجه قوله يا سيدي خلاص وصلت ؟

طيب وموظف القطاع الخاص :

هنا بقه يا حبيبي حتقدر تاخد حقك عشان الموظف اللي مش كفئ بيطرد
الفكرة ان لو افترضنا وجود موظف قطاع خاص رخم او غبي ومش عايز يفهم
حيبقى غالبا هي بتكون حاجه انت عايزه يعملهالك وهي مش من صلاحياته يعني لو عملهالك من غير ما يرجع للمدير حيخصم منه مرتبه وعشان كده حتلاقيه بيرفض من غير سبب

طب تعمل ايه ؟

تقوله الاول باحترام انك عايز تقابل المدير او حد مسئول ولو افترضنا انه رفض يبقى تعللي صوتك وتزعق شويه وحتلاقيه خاف منك على طول ونادى المدير
وانت قدام المدير تتكلم بصوت عالي وبثقه وتقول ازاي ده يحصل هنا ؟ ايه المهزله دي
طبعا هما كل اللي بيهمهم هو سمعه المكان وعشان كده غالبا حتلاقي المدير يعتذرلك ويعملك اللي انت عايزه

طبعا انا مش قصدي من كده انك تبهدل اي موظف قطاع خاص ولا حاجه لا سمح الله
لكن اي مشكله قابلتك مع موظف قوله باحترام انك عايز تقابل المدير
لو لاقيته بيرخم يبقى لازم تخوفه بصوتك العالي

0 comments:

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB