الكشف الطبي - تابع نصائح مهمه للكشف الطبي

|


طبعا انت قبل ما حتدي الدكتور الورقه اللي فيها الرسم الكروكي بتاع بيتك انت وكل زمايلك حتقلعوا كل هدومكم ما عدا الشورت او الشورت الابيض او البوكسر وحتدخلوا على كل كل كشف واحد واحد ورا بعض وبين كل حجرة وحجرة ستاره بتفصل كل كشف عن التاني

في كل كشف الدكتور بيسألك اذا كنت بتشتكي من مشكله معينه ليها علاقه بالكشف اللي انت داخله
يعني مثلا في كشف العظام الدكتور حيسألك اذا كنت مركب مسامير او عندك فقرات او مفاصل او عظام مكسورة او فيها شرخ مثلا وكده يعني

اهم حاجه عشان تبقوا فاهمين :

من مصلحتك ومن مصلحه الدكتور نفسه انك لو بتشتكي من اي حاجه بكرر اي حاجه اي حاجه ليها علاقه ولو حتى بعيده بالكشف ساعتها انت بتقوله عليها وهو اللي يحكم اذا كان الشئ اللي عندك يستحق يخليك تعمل فحص تاني او ينزلك عسكري من ظابط او تاخد اعفاء حتى

طيب ليه من مصلحته انك تقوله كل حاجه ؟

اقولكم انا :

عشان بمنتهى البساطه الكشف اللي انت بتكشفه اسمه كشف مبدأي او كشف أولي بمعنى انه مش هو الكشف النهائي يمعنى ادق الدكتور لما بيكون شاكك انك عندك حاجه احتمال تطلعك من الجيش او حتى تخليك لائق ب ( يعني عسكري ) ساعتها في ملفك الطبي بيكتب غير لائق او محتاج فحص يعني لو هو كتبلك محتاج فحص يبقى انت كده مش اخدت اعفاء لكن ده معناه انك حتكشف تاني اما في نفس اليوم او بعدها في يوم تاني او حتى في لجنه طبيه عليا في القاهرة ( الكشف الطبي في حلميه الزيتون )

اللي عايز اوصلهولكم ان الناس اللي كانت بتاخد اعفاء طبي في نفس يوم الكشف الطبي هما بس اللي كانوا بياخدوا اعفاء عشان وزن زائد او موضوع عرض الصدر لكن اي حد تاني بيتكتبله انه يفحص تاني وساعتها يياخد اعفاء او لائق ب او ممكن يكمل حتى لائق أ ( يعني ظابط وده في حاله انه عذره الطبي غير مقبول ولن يؤثر على تجنيده )

والدكتور من مصلجته انه لو شاكك في اي حاجه انه يكتبلك فحص تاني والناس المتخصصه هما اللي بيحددوا بمعنى ادق هو بيشيل ايده عشان ميتحطش في مشكله طيب ليه ؟ عشان انت بعد ما بتخلص كل الكشوفات خااااالص بييجي عقيد دكتور وبيسألكم حد بيشتكي من حاجه ؟ حد حاسس انه اتظلم في الكشف ؟حد حاسس انه كان المفروض ياخد اعفاء طبي واتظلم واتكتبله لائق ؟

لو انت مظلوم وقولتله على اللي عندك وكان عذرك فعلا يستحق انك تاخد اعفاء بينما الدكتور اللي كشف عليك اول مرة مأخدش باله او مهتمش ساعتها الدكتور العقيد حيزعقله والله اعلم اذا كان فيه عقاب بسيط ليه ولا لأ فاهمني ؟

طيب في ناس حتستعبط لا مؤاخذه وحتتحايل على اول دكتور حيكشف عليك وتقوله اكتبلي فحص ساعتها الدكتور ده حيبهدلهم

ليه؟

عشان هو اساسا بردك الدكتور العقيد حيعاقبه لو لقاه محول ناس كتير من غير ما يستحقوا للفحص الطبي الثاني ابسطها ده معناه انه مش فاهم شغله او مكوسها معاهم وطبعا ده غير مقبول اطلاقا في التجنيد المصري

طيب ايه الحل ؟

بمنتهى البساطه اولا تروح بدري وتكون مكمل ورقك وتكون من اول ناس بتكشف ( يعني اول مجموعه ) عشان ساعتها الدكاترة بيبقوا رايقييييييين جدا وانت لو عندك اي حاجه بتقولهم عليها و اهم حاجه تتكلم باحترام ومن غير دلع وتكلم كل دكتور في تخصصه يعني متقولش لبتاع العظم انا نظري ضعيف مثلا فاهمني ؟ والدكتور لما بيلاقيك بتتكلم باحترام ومن غير استعباط ساعتها على الاقل حيحترمك وهو اللي حيقولك اذا كان عذرك ليه دلاله ولا لأ

عشان حط نفسك انت مكان الدكتور لما انت تروحله متأخر بعد ما يكون كشف على ناس كتيييييييير فيه منهم اغبياء وناس كانت بتستعبط وكل واحد يقوله انا عندي كذا وكذا وناقص يقولوله انا عندي تسلخات ومش حينفع اخش الجيش D:

فبالتالي الدكتور على بال ما انت جاي تقوله اللي عندك حيكون اساسا مخنوق من الناس اللي قبلك وممكن يفتكرك انت كمان بتستعبط ( مع ان انت ممكن يكون سؤالك برئ فعلا ) وعشان كده انا ركزت قوي واكدت عليكم لمصلحتكم ان انتم تكونوا من اول ناس بتكشف عشان تتعاملوا باحترام وكمان فرصتكم انكم تدردشوا مع الدكاترة وتقولولهم اللي عندكم اكتر

وممكن من لاشئ تطلع حاجه انت كنت فاكرها بسيطه ومالهاش اي علاقه بالجيش تكون الحاجه دي هي السبب في طلوعك من الجيش وده حصل فعلا لناس كتيييييييييييير وحقولكم ايه اللي حصل معايا بالضبط عشان تتأكدوا بنفسكم

5 comments:

غير معرف يقول...

ممكن توضح شوية موضوع عرض الصدر...قصدك محيطه يعني متر حول الصر ملفوف ولا عرض بمسترة صلبة عادية و ايه لازمته...يا تري ايه هو حد الوزن بالظبط اللي بيخرج اعفاء أو عسكري...أصل أنا عندي دهون زيادة في الصدر عن الطبيعي لوزني...شكرا مقدما

admin يقول...

عرض الصدر أقصد بيه محيطه
وبالنسبه للوزن :
هو بيتحسب بحسبه معينه اعتمادا على الطول والوزن
يعني ممكن يبقى وزنك كبير بس الوزن ده مناسب لطولك وبالتالي حتبقى لائق
وممكن واحد تاني يبقى وزنه اقل منك بس قصير عنك ويعتبر وزنه مش مناسب لطوله
هي ليها قاعده حسابيه بس بصراحه معرفهاش ومش عايز افتي فيها
عموما طالما انت عندك دهون كتير ومش عملاق في الطول يبقى غالبا حتعتبر ان شاء الله غير لائق كوزن

ميمو يقول...

اخي هي الاملاح الزائدة تخرج من الجيش

admin يقول...

اخي ميمو بصراحه لم اسمع ابدا عن اي شخص يخرج من الجيش عشان الاملاح الزايده
عموما لو عندك تحليل يثبت ان عندك املاح زايده جيبه معاك في التجنيد واسأل الدكتور عليه جايز يطلعك من الجيش ( بس للامانه متحطش امال كبيره على الموضوع ده معلش ) وان شاء الله تطلع من الجيش لاي سبب تاني ممكن انت تكون مش واخد بالك منه
بالتوفيق وابقى طمني

غير معرف يقول...

معلش يا جماعه أنا عمال أكتب السؤال ده في كل مكان يقابلني
أنا عندي شرخ في الفقرة الرابعه في الضهر وبداية انزلاق غضروفي وهعمل عملية تثبيت فقرات
وعندي كمان اختناق في أعصاب الكوع وهعمل عملية نقل أعصاب وبتر للجزء الملتهب فيها
ومعاي حوالي 12 أشعة وكشوفات منها بتاريخ السنة دي ومنها بتواريخ قديمه
هل الكلام ده يديني معافاه من الجيش ..؟
أرجوووووووووكم ردوا علي الكشف الطبي بتاعي يوم السبت الجاي 30 /10

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB