اجراءات التجنيد - تابع القيد العائلي

|


بعد اسبوع تقريبا من تقديمك لنموذج 140 ( وطبعا بعدها الموظفه اعطتك وصل ) حتروح تاني السجل المدني ومعاك الوصل ويفضل لو معاك كمان صورة بطاقه الوالد ( حقولكم ليه بعد شويه ) وبعد كده نفس الموظفه ( للاسف D: ) حتديها الوصل وهي حتديك القيد العائلي بس خللي بالك لأن القيد العائلي ده مش هو الصورة النهائيه
بمعنى ادق مش هو ده القيد العائلي اللي بالكمبيوتر بل هو يعتبر زي حاجه اوليه للقيد العائلي

والقيد العائلي اللي انت استلمته ده بتراجعه على جنب ( ولازم تراجعه كويس جدا عشان الحوار ده مفيهوش هزار يعني انا مثلا واحد صاحبي كانوا مطلعين ان ابوه متجوز واحده تانيه D: ) فخللي بالك وراجع البيانات كويس عشان لو فيه اي حاجه غلط ساعتها ( وان شاء الله ميكونش فيه ) حتديه تاني للموظفه عشان تظبطه تمام

المهم بعد ما انت استلمت القيد العائلي وراجعته حتقوم كاتب اقرار بسيط على القيد العائلي ده تقر فيه ان البيانات كلها صحيحه

والاقرار حيبقى بسيط اوي بالشكل ده :

اقر انا فلان ان البيانات كلها صحيحه وحتمضي كمان ويبقى عملت الاقرار

وبعدين بعد ما استلمت القيد العائلي وعملت الاقرار حتقولك الموظفه عند الموظفه الفولانيه في الشباك الفولاني وحتدفع 10 جنيه ونصف وحتديها القيد ده
والمفروض اساسا ان القيد ده هما مدبسين فيه صورة بطاقه والدك اللي كنت مقدمها مع نموذج 140 زمان لكن اللي حصل معايا ان صورة البطاقه اتفكت من الدبوس وضاعت طبعا ( واضح اني كنت محظوظ D: ) واضطريت اني اروح واجيب صورة تانيه من بطاقه والدي وبالتالي ريحوا دماغكم انتم وجيبوا صورة البطاقه احتياطي لعل وعسى

بعد كده الموظفه حتقولك تعالى بكرة وانت حتجيلهم بكرة ان شاء الله ومعاك بطاقتك الشخصيه طبعا وحتستلم اخيرا القيد العائلي الكمبيوتر
وبكده تبقى خلصت اجراء سخيف من اجراءات التجنيد والتعبئه ( وعلى فكرة القيد العائلي للاسف له مده صلاحيه مش عارف بالضبط اد ايه بس بأي حال من الاحوال مش ازيد من سنه )

2 comments:

عمرو يقول...

السلام عليكم انا فى مشكله واتمنى الافادة انا اسمى عمر عبدالمحسن سيد وحيد والداى بدات فى اجرات التجنيد ورحت اجيب البطاقه العسكريه لاقيت الاسم غلط لقيته مكتوب محمد عبد المحسن سيد وقم تاريخ الميلاد مظبوط ورقم البطاقه مظبوط فمازا افعل

admin يقول...

مشكله فعلا
لكن محدش حيقدر يساعدك الا الاشخاص المختصين الموجودين في منطقه التجنيد

نصيحتي ليك انك تتصل بمنطقه التجنيد اللي انت تابع لها وتطلب منهم انك تكلم شخص او ظابط مسؤول ( وابعد تمااااااااااما عن العساكر عشان هما مش فاهمين اي حاجه )
وده لنك فيه ارقام تليفونات مناطق التجنيد المختلفه
http://eltagnid.blogspot.com/2009/10/blog-post_29.html

وممكن كمان تروح منطقه التجنيد نفسها وتكلم مدير المنطقه نفسه او اي رتبه كبيرة واسأله ايه الخطوات اللازمه لتعديل الاسم
معلش انا يمكن مقدرتش افيدك قوي عشان الموقف ده عمره ما حصل لأي شخص اعرفه وبالتالي مش عارف الاجراءات المطلوبه بالضبط في حالتك ومحدش حيدلك صح الا شخص بيفهم في منطقه التجنيد سواء كان ظابط او مدير المنطقه ذات نفسه
وربنا معاك ان شاء الله تكون المشكله بسيطه وتتحل بسهوله بإذن الله

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB