اجراءات التجنيد - الاوراق المطلوبه عند التقدم للجيش

|


الاوراق المطلوبه للتجنيد والتعبئه كالتالي :

1- شهاده ميلاد كمبيوتر وحقولكم بتتعمل ازاي في احد المواضيع الموجوده في المدونه

2- بطاقه 6 جند اللي كنا سلمناها للكليه

3- فيش جنائي عشان الجيش
ولازم يكون عشان الجيش مش لأي سبب تاني

4- قيد عائلي
و ممكن استخدام الوصل مختوم لو ملحقش يطلع
و خللي بالكم عشان الناس اللي بتحتاج تعمل القيد العائلي هما  بسسسس اللي يعتبروا لائق أ وحيدخلوا ظباط  أو اللي كانوا عندهم اعفاء سواء مثلا اذا كان وحيد او ابوه متوفي وهو العائل الوحيد للاسره  


يعني من الاخر مش كل الناس حتعمله   لكن على سنتي انا كان كل الناس  بتعمله وده اختلاف مهم لازم تاخدوا بالكم منه


5- عدد 4 صور شخصيه على الاقللللللل ويا ريت يكون عندكم اكتر احتياطي

6- نموذج 40 اللي بتجيبوه من البوسطه ويا ريت تحاولوا تجيبوه من بدري عشان للاسف النموذج ده بيخلص بسرعه في معظم البوسطه وساعتها حتضطر تلف الدنيا عشان تلاقيه والنموذج ده هو اللي بتملاه عشان تعرف تعمل القيد العائلي

7- افاده من الكليه او شهاده مؤقته عشان تثبت بيها انك مؤهل عالي وتثبتلهم انك اتخرجت من كليه كذا

8- طبعا البطاقه الشخصيه ودي مفيهاش كلام

9- لو كان عندك اخ اصغراو اخت صغيره ومعندهومش بطاقه شخصيه يبقى لازم تعملهم شهاده ميلاد كمبيوتر عشان حتحتاج الرقم القومي بتاعه عشان القيد العائلي

10- صور البطاقات الشخصيه للعائله كلهاااا الاب والام والاخوات والاخوه

11- صورة من عقد زواج الوالد والوالده عشان القيد العائلي وغالبا حتحتاج الاصل عشان توريه بس للموظفه مع ان الموظفه لما روحتلها كانت مكسله ومبصطش على الاصل D:

12- تحليل فصيله دم من مستشفى حكومي او خاص او حتى معمل تحاليل بس المهم يكون عليه ختم المكان اللي عملت فيه التحليل

13- لو افترضنا لا قدر الله ان الوالد متوفي يبقى في الحاله دي حتحتاج تطلع له شهاده ميلاد كمبيوتر من اي مكتب خدمات جماهيريه وده كلام اكيييييييييد

شفتم اجراءات التجنيد والتعبئه في مصر سهله ازاي D:


5 comments:

محمد شعيب يقول...

جميل الشغل اللى انت عامله ده بس انا عندى سؤال اللى مزدوج الجنسية يعمل ايه يعنى انا فى اخر سنة فى الكلية وعايز اسافر جبت شهادة قيد عشان اعمل باسبور عاملولى الى منطقة التجنيد وطبعا لو جيت اسافر بالباسبور التانى الاجنبى هايرخموا عليا فى المطار ومش هايخلونى اسافر اللى لما اثبت انى معفى او مستثنى بورقة مختومة فلو عندك اى ادنى فكرة عن الموضوع ارجو انك تساعدنى

admin يقول...

معلش ممكن توضحللي وضعك اكتر ؟
انا مش فاهم بالضبط ايه المشكله او مش فاهم وضعك ايه بالضبط
اللي حصل معايا اني معايا شهاده تأجيل وعلى اساسها باخد اذن سفر

انت بقى لسه موقفك من التجنيد متحددش ولا اخد تأجيل ولا اعفاء ؟
لو انت موقفك من التجنيد متحددش فمش حتقدر تسافر غير لما موقفك التجنيدي يتحدد
لو اخدت تأجيل يبقى عادي جدا ممكن تاخد اذن سفر على اي باسبور من الباسبورات اللي معاك وولكن يفضل على ما اعتقد الباسبور المصري
لو اخد اعفاء يبقى بردوا مفيش مشكله وخد تصريح سفر بسهوله على الباسبور المصري او اي واحد منهم حتى

مش عارف صراحه ردي ده فيه اجابه على سؤالك او لأ ؟
مستني ردك

محمد شعيب يقول...

شكرا على ردك
انا دلوقتى فى اخر سنة فى بكارليوس تجارة ومعايا جنسيتين وكنت عايز اسافر فى نص السنة يعنى يوم 28/1/2010 اللى جاى لمدة اسبوعين او تلاتة لظروف علاجية ليس اكثر
السؤال دلوقتى ينفع اليومين دول اروح منطقة التجنيد
واخلص ورقى بما انى مزدوج الجنسية وبموجبهم القانون بيقول مستثنى ( برغم انا مش عارف يعنى ايه تاجيل ولا اعفاء ولا مروحش خالص )..
وعلى رايك الباسبور المصرى احسن بس عشان اعمله طلبوا منى شهادة قيد وبما ان انا فى اخر سنة شهادة القيد اتعملت لمنطقة التجنيد بحجة انى ها اهرب
يعنى اجيب كل الاوراق المطلوبة ومعايا صورة من الجنسية التانية والباسبور واروح منطقة التجنيد
انا المركز اللى تابع ليه التعبئة فى المنصورة لانى من دمياط

محمد شعيب يقول...

ملحوظة*
انت كاتب فى اجراءات التجنيد بطاقة 6 جند انا كنت سلمتها للكلية بس الصورة ومعايا الاصل محتفظ بيها مش دى اللى انت قصدك عليها(( اللى قد البطاقة مكتوب فيها تاريخ الميلاد وارقام بينهم فواصل والرقم القومى والاسم والعنوان وعليها ختم النسر وكود الباركود))

admin يقول...

ايوة هي دي بطاقه 6 جند ولاوني فاكر اني كنت سلمت الكليه الاصل مش الصورة بس لو انت معاك الاصل اوكي يبقى خلاص مفيش مشاكل

جهز كل الورق الموجود وروح لمنطقه التجنيد
وللتأكد اكتر اتصل ب
منطقه تجنيد المنصورة...............050/2373392
وشوف لو فيه اي ورق تاني حيحتاجوه
بالتوفيق ان شاء الله يا محمد

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB