اجراءات التجنيد - شهاده ميلاد بالكمبيوتر

|

في البدايه لازم تعرفوا ان استخراج شهاده ميلاد كمبيوتر ده احد اجراءات التجنيد في مصر السهله جدا بس مشكلته بيطول اوي

حتعملوها ازاي:

1- حتجيب صورة من شهاده ميلادك سواء عاديه او لو كان عندك صورة لشهاده ميلاد كمبيوتر كنت عملتها قبل كده
2- صورة البطاقه الشخصيه
3- قلم ازرق :D عشان حتملى بيانات

طيب حتعملوها منين ؟

بمنتهى البساطه من اي مكتب خدمات جماهيريه موجود في محافظتك ودول بيبقوا كتير

بالنسبه للاسكندريه موجود في كزا حته زي درباله ومدينه فيصل
وستانلي ( وستانلي بالذات بيقولوا ممكن تطلعها بسرعه في خلال يوم او اتنين مش عارف ليه وازاي ؟ بس ده كلام اكيد )

او حتى في خالد بن الوليد قدام الحزب الوطني ( وعلى فكرة هو بيبقى فاضييييييييييييي خاااااااااااااااالص وروقان بجد الموظفه بتيجي 9 انا جتلها 9 وربع كنت اول ولد هناك جه بعدي راجل و بنتين ههههههه منتهى الروقان )

المهم بتاخد منها استماره ب 9 جنيه وتملاها وبياناتها بسيطه مش ازمه يعني وتسلمهالها مع صورة شهاده الميلاد وصورة البطاقه وحتقولك تيجي تستلمها للاسف بعد 10 ايام
يعني المشكله بس هي التأخير وعشان كده لو في واحد معندوش يا ريت يقدم على شهاده الميلاد الكمبيوتر اول خطوة عشان بتطول

طيب فيه حل تاني اسهل واريح وبياخد يومين بس عشان يطلع ايه هو ؟

عن طريق الانترنت والكلام ده اكيد عشان انا نفسي جربته واستلمت الشهاده عن طريق الانترنت
من خلال موقع الحكومه

اضغط هنا

فتملى البيانات بتاعتك من الانترنت وبعد كده حتستلم شهاده ميلاد الكمبيوتر بالبريد حييجي لحد بيتك راجل يخبط عليك ويسلمهالك
وتكلفه الحوار ده اغلى شويه بالضبط 30 جنيه + 6 جنيه وربع تكلفه التوصيل


10 comments:

hisham يقول...

اية يازميلي الجمال دة علي فكرة انا ساكن في ميامي
والكشف الطبي بتاعي قرب
بس انا ماعملتش القيد العائلي لأنة كان مش مطلوب
غير من اللي عايزين يأخدا اعفاء سواء كان وحيد والدية
او ........
المهم
انا مش هعملة لأني ورقي كلة اتعمل والكشف الطبي اتحدد

بس في حاجة شاغلني انا دراعي كان مكسور زمان
ودلوقتي هي شغالة عادي بتتفرد لأخرها بس ما بتتناش لاخرها لكن هي شغالة طبيعي زي الايد الثانية
هل دة سبب اني اخد اعفاء

admin يقول...

بص بصراحه عشان اكون صريح معاك لو وضع ذراعك كويس حيبقى غالبا والله اعلم ممكن اقصاها تنزل عسكري ( لائق ب ) خصوصا ان ظروف الجيش حاليا زي ما انت شايف محتاجين ناس في اوضاع عدم الاستقرار اللي مصر فيها حاليا
بس لو ذراعك مكسور جامد فعلا ممكن تاخد اعفاء ده على حسب رأي دكتور العظام وان شاء الله خير ومتقلقش

hisham يقول...

ربنا يكرمك اخي وما توقعتش سرعة الرد

بس عندي كام سؤال شاغلني بعد ازنك
-عشان تكون ظابط احتياط في الجيش هما اللي بيحددا ولا انت اللي بتقول عايز ابقي ظابط يعني انت بيكون ليك رأي في الموضوع دة طبعا بعد ما تكون لائق أ ؟

-لو انا دخلت الجيش ان شاء اللّه احتمال جيشي يكون فين يعني مدن القناة ولا مطروح ولا قبلي ولا اسكندرية نفسها محل اقامتي

-انا دلوقتي ورقي خلاص ومدبس كلة مع بعضة وانا مش مصور منة ولا نسخة انا مش عارف هل افك الدبابيس واصور ولا لما اروح هناك في يوم الكشف الطبي وابقي اشوف اعمل اية


اسف علي كثرة الاسئلة وربنا يحفظ مصر من كل سوء

admin يقول...

1- هما اللي بيحددوا اذا كنت حتبقى ظابط احتياط أو لأ الموضوع يرجع ليهم مش ليك

2- التوزيع محدش بيعرفه ابدا الا هم وحتى التوزيع ممكن يتغير على حسب مزاجهم انا واحد صاحبي كان واسطه جابوه بحريه لكن في الاحداث دي نقلوه السلوم !!!!

3- فك الدبابيس عادي وصور الورق وبعد كده ابقى دبسهم تاني وحطهم في دوسيه وكده كده هما هناك بيقولولك على ترتيب معين للورق كل الناس بتلاتبه ويدبسهولك هناك تاني

بالتوفيق يا باشا ان شاء الله

omarpasha7 يقول...

انا اول مره اشارك وتسمحلي حضرتك اني اهنيك على المدونه الرائعه ديه وان شاء الله تتكتبلك في ميزان حسناتك....انا عندي استفسار صغير..انا دراعي الشمال كانت مكسوره واتلحمت غلط..يعني لما اجي افردها بتبان قوي انها ملويه(مش مستقيمه) والدكتور الأول كتبلي على فحص عضام واجيب اشعه معايا..وعملت الفحص و عقيد هوه الي كشف عليا وكان شكله مدايق كده وقعد يبص على دراعي شويه ومن غير ما يبص على الأشعه قام كاتبلي لائق عضام وخدت ال 110 جند واترشحت ضابط احتياط..هل ممكن اعمل تظلم؟وامتى وفين وايه الاوراق المطلوبه؟ وهل ممكن الكشف الطبي بتاع حلمية الزيتون يطلعني اعفاء ولا اخره لائق ب وابقى عسكري؟وكمان سؤال لو سألني كانت مكسوره قبل كده ولا مولود بيها كده ايه الأفضل؟مع العلم انها ملويه جامد وفي ناس كانت ملويه اقل مني وفي نفس الدراع وطلعو اعفاء.. وشكرا

Ronaldo يقول...

السلام عليكم

ازيك يا جميل عامل أيه ؟

اولا الف شكر بجد على مجهودك دا وربنا يكرمك
انا عندى أستفسار
أنا عملت عملية الفتاق الاربى اللى عند الخصية من 7 سنين الحمد لله س المشكلة انى لما بجرى او أشيل حاجة او أقف لمدة بتوجعنى مكان العملية وهو باين - دا أيه نظامه فى التجنيد
ثانيا أنا كان عندى جزع فى الرباط الصليبى وتاكل فى الغضاريف وكنت باخد جلست علاج طيبعى والحمد لله دلوقتى تمام بس بحس كتير انها زى ما تكون متسمرة وزى خشونة كدا وفى دواء دايما باخده لغاية دلوقتى عشان الموضوع دا
ثالثا أنا لما روحت أعمل الكشف الطبى بتاع النقابة انا نظرى ضعيف لما روحت وعملت مرضيش قالى انت كدا حرفضلك الاستمارة جيب النظارة وتعاله جبت النظارة وجيت وفعلا اشر على الاكشف وكتب لائق بنظارة - هل اخد الكشف دا معايا انا معايا صورة منه واخد النظارة معايا ولا اروح من غيرهم ولا أيه النظام

وشكرا وأسف على تعبك معايا يا جميل مستنى ردك

admin يقول...

عمر باشا :
نتيجه التظلم حتبقى غالبا في الكشف الطبي في حلميه الزيتون لما يكشفوا عليك تاني هناك وممكن يطلعك اعفاء
ورأيي انك تقولهم انها مكسورة من وانت صغير (عشان اللحام بتاع العظام ممكن يبان في الاكس راي ويعرفه دكتور العظام
بالنسبه لاوراق التظلم بصراحه مش عارفها بس انت يا اما تتصل بمنطقه التجنيد يا اما تروح شخصيا (وفي رأيي يفضل انك تعمل الاتنين وتشوف موضوع التظلم والارواق المطلوبه قبل الكشف الطبي اللي في حلميه الزيتون )
بالتوفيق ان شاء الله وابقى طمني عملت ايه

admin يقول...

رونالدو :

عمليه الفتاق حتقول لدكتور الجراحه عليها (وهو ممكن يحولك لجنه طبيه عليا ومنها ممكن تاخد اعفاء او تدخل الجيش على حسب مده خطورة أثر الجراحه)

دكتور العظام برضه قولله على موضوع الرباط الصليبي وشوف حيقوللك ايه

موضوع النظر ملوش لازمه تجيب شهاده عشان هما كده كده بيشوفوا نظرك عامل ايه ولو مشوفتش العلامات فعلا بيخللوك تكشف مرة تانيه نظر وعلى حسب درجه النظر ممكن تاخد اعفاء نهائي او لأ
بالتوفيق ان شاء الله

Ronaldo يقول...

شكرا بجد يا جميل على ردك وعلى الموقع الجميل جدا دا

دلوقتى أنا روحت الحمد لله وشوف رغم كل اللى قولتهولك دا كتبولى لائق أ - بصراحة الكشف كان كروته كله
المهم أنا دلوقتى ليا أرجاء ورشحونى ظابط احتياط
هل ينفع انزل عسكرى بعد كدا ولا خلاص

ثانيا هل لظابط الاحتياط دا سرية رياضية أصلى انا ليا نشاط رياضى وأمتى اقدم الورق دا ؟

والف شكر ليك يا جميل

admin يقول...

ممكن تنزل عسكري لو سقطت في كشف الهيئه سواء سقطت طبيعي او بواسطه

بصراحه معرفش حاجه عن السريه الرياضيه وعمري ما سمعت عنها معلش

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB