الكشف الطبي - اللي حصل معايا في الكشف الطبي في منطقه التجنيد

|


انا بعد ما خلصت الكشوفات كلها خااااالص لقيت الدكتور بيقولنا حد يا جماعه بيشتكي من حاجه ومقالهاش لينا ؟ حد عنده حاجه وشاكك ان ليها علاقه بالجيش ومرضاش يقولهالنا ؟

انا لما لقيته بيلح كده روحت اتشجعت وقولتله على حاجه انا عارف انها مبتطلعش من الجيش بس قولت اجرب مش حخسر حاجه
وهي ان انا كان عندي فلات فوت لحمي ( مش عظمي ) وانا عارف اساسا ان الفلات فوت العظمي بس هو اللي بيطلع من الجيش مش الفلات فوت اللحمي لكن لما روحت للدكتور قولتله راح قالي انها مبتطلعش من الجيش

روحت قلتله طيب انا عندي ظهري مبيستحملش اني افضل قاعد لاقيته ابتسم وقاللي اه بيتعبك D: قاللي بردك مبتطلعش من الجيش
بس بالمناسبه لو فيه عندك غضروف او الفقرات حاسس انها مش مظبوطه يا ريت تعمل اشعه قبل الكشف الطبي في التجنيد وتاخدها معاك عشان لو كان عندك الحوار ده يبقى على الاقل حتعمل فحص تاني وانا اعرف واحد اخد اعفاء عشان كان عنده الفقرات مش مظبوطه

المهم انا طبعا اصبت بخيبه امل وقولتله طيب وانا بكلمه لاقيت الدكتور بيقوللي افتح فمك كده روحت فتحته وقاللي اقفل فمك على ضروسك فقفلت فمي لقيته بيقوللي ان عندي عدم تطابق الفكين ( يعني سناني وضروسي مبيقفلوش على بعض عشان الفك السفلي عظامه موجوده للامام قليلا وده يسمى في علم الاسنان ب class 3 )

طبعا انا كنت عارف حوار فمي ده من زمان بس انا مقولتلوش عليه عشان لم يخطر ببالي انه ليه اي علاقه بالتجنيد من الاساس

المهم لقيت الدكتور قاللي انت حتتحول لجنه طبيه عليا في القاهرة ( وانا بالمناسبه كنت مترشح ظابط ) طبعا كنت فرحاااااااااااااان جدا

وسألته يعني ايه لجنه طبيه عليا ؟

قاللي ديه معناها ان مش كل التخصصات الطبيه موجوده في العامريه وتخصص الاسنان والجراحه وكام تخصص كمان مش موجودين في العاميريه لكن موجودين في القاهرة بس وهما هناك لما بتروح بتكشف تاني ( الكشف الطبي في حلميه الزيتون ) وهما بيحددوا اذا كان وضعك يستحق تنزل عسكري ولا تفضل ظابط ولا تاخد اعفاء

وسألته ايه وضعي من حكم خبرته ( مع انه كان شكله لسه متخرج لانج ) فقالي انت غالبا ان شاء الله اعفاء
طبعا كنت قمه السعاده وقولتله :

طيب بعديها انا اعمل ايه ؟

قاللي سيب بطاقتك للعسكري المسؤول عن التحويل للجنه الطبيه العليا وروح استنى لحد ما تاخد نموذج 110 ( وده اللي كل بيروح الكشف ومأخدش اعفاء في يوميها بياخده عشان هو ده اللي بيكون مكتوب فيه معاد الارجه الخاص بيك )

المهم لما الوحد بياخد النموذج بيديه للعسكري اللي اديته البطاقه عشان يختملك عليه ختم اسمه لجنه طبيه عليا لو انت كنت مترشح عسكري او بيبقى الختم مكتوب عليه تأكيد كشف اثناء لجنه كشف الهيئه وده لو انت مترشح ظابط وبعد كده بتروح لمكتب الامن اللي عند البوابه والعسكري بيبصمك على النموذج وتروح اخيييييييييييرا بعد عناء وبتروح يوم الارجه ( يوم الارجاء ) عادي وتشوف اذا كنت اخدت تأجيل يبقى خير وبركه ومش حتحتاج تعمل حوار اللجنه الطبيه العليا ( الكشف الطبي في حلميه الزيتون )

اما لو لا قدر الله كنت حتدخل الجيش يبقى في الحاله دي:

لو انت مترشح عسكري يبقى بتروح لمكتب الشكاوي وتقولهم عايز تتحول لجنه طبيه عليا وتعمل اعاده كشف وتوريهم نموذج 110 المختوم وبعد كده حتروح القاهرة تقريبا في خلال اسبوع ومعاك الاتي :

1- نموذج 110 جند + 2 صورة
2- عدد 2 من صورة شخصيه مقاس 4*6 سم
3- عدد 2 من صورة البطاقه الشخصيه

وحتعيد الكشف الطبي في القاهرة في حته اسمها حلميه الزيتون

لو انت كنت مترشح ظابط وعندك تأكيد كشف اثناء كشف الهيئه يبقى من اسمها يبقى وقت كشف الهيئه بتاعك حتروح ومعاك الاتي :


1- نموذج 110 جند + 2 صورة
2- عدد 2 من صورة شخصيه مقاس 4*6 سم
3- عدد 2 من صورة البطاقه الشخصيه

وحتقوم مقدم هناك ( في القاهرة في حلميه الزيتون ) ( مش في منطقه التجنيد ) على شكوى عشان تعيد الكشف الطبي تاني

الموضوع التالي حقولكم فيه ان شاء الله عن الكشف الطبي وعن كل كشف بالتفصيل

21 comments:

محمد يقول...

بقولك ايه يا استاذ احمد , انا مواليد 27/4/1986 وان شاء الله مستنى النتيجة واكون ناجح باذن الله

كده يبقى انا هاقدم فى شهر كام للتجنيد؟.

محمد يقول...

وعلى فكرة انا اسكندرانى يعنى برضه تبع نفس ادارة تجنيدك

وعايز اطمن عملت ايه فى الجيش؟

وانا مؤهل عالى زيك برضه بس انا حقوق

admin يقول...

يا محمد انت كده نصف اول
يعني الكشف بتاعك بيبقى في شهر 8
عشان تعرف معادك بالضبط يستحسن تروح اي ادارة تجنيد في اسكندريه وليكن مثلا اللي جنب قسم المنتزة وشوف غالبا حتلاقي ورقه مكتوب فيها مواعيد كل الناس بمؤهلاتهم وكمان حتلاقي الاوراق المطلوبه
وعلى حسب ما سمعت ان موضوع القيد العائلي مش حيبقى ضروري الا للي حيدخلوا ظباط

وانا بالنسبالي الحمد لله اخدت تأجيل
ربنا يكرمك انت كمان ان شاء الله :D

محمد يقول...

ربنا يخليك يا استاذ احمد وبالتوفيق لك ان شاء الله

يعنى انا المفروض الكشف بتاعى الشهر ده بتاع الجيش ؟؟؟

وكل سنة وانت طيب ياطيب

محمد يقول...

ومعلش استفسار تانى

هو لما حضرتك اخدت التاجيل اتطلب منك ان الوالد يجى معاك فى مكان التجنيد ؟ وياريت تقولى ايه الورق اللى اتطلب منك علشان تاخد التاجيل

admin يقول...

يا محمد اه ان شاء الله غالبا الكشف بتاعك الشهر ده ولو مكنتش لسه عملت اي حاجه في ورق التجنيد انصحك تروح لاي اداره تجنيد زي ما قلتلك واعرف امتى معادك بالضبط

وبالنسبالي انا كملت كل اجراءات التجنيد عادي وعملت الكشف الطبي لحد يوم الارجاء لما انا وكل دفعتي الحمد لله اخدنا تأجيل

بمعنى انه محدش طلب مني اجيب والدي او اي حاجه من الكلام ده
ومكانش فيه ورق مطلوب تاني كل القصه انه الناس اللي اخدت تأجيل في يوم الارجه قالولنا يوميها نيجي معاد معين بعدها باسبوعين تقريبا ومعانا نموذج 110 وفلوس بسيطه حوالي 12 جنيه او حاجه زي كده عشان كنا حنشتري طوابع من هناك وكتيب صغير بس وهناك كانوا بينادوا بالاسامي وتاخد شهاده التأجيل
مكانش فيه اي ورق تاني مطلوب او اي اجراءات تانيه
بالتوفيق ان شاء الله

محمد يقول...

طيب بص يا استاذ احمد انا والدى عنده 62 سنة ووالدتى مطلقة وانا عايش مع والدتى

فهل طلاق والدتى او ان والدى معدى ال 62 يخلينى اخد اعفاء مؤقت ؟؟

وهل لو هامشى فى اجراء الاعفاء من الاول (الاعفاء بسبب طلاق والدتى او بسبب ان والدى عدى 60 سنة ) فهل هايبقى ليا ورق احضره مختلف؟

وهل ممكن يطلبوا ان الاب يكون متواجد ؟ لان الصراحة انا مش مقيم معاه زى ماقولتلك

استفسار اخير استاذى احمد , هما فى القيد العائلى او فى اى اجراء من اجراءات التجنيد بيبصوا فى ظهر البطاقة علشان يعرفوا هى انتهت ولا لا ولا موضوع الانتهاء ده مش مشكلة؟

معلش داوشك معايا بس انا عشمى فى الله ثم فيك

وكل سنة وانت طيب

محمد يقول...

وعلى فكرة انا اعرف المدونة من 3 شهور تقريبا وطلع عينى عقبال ماكتب فيها كومنت ومكنتش بعرف سبحان من خلانى اعرف كومنتات دلوقتى :)

admin يقول...

اولا يا اخ محمد كل سنه وانت طيب ومرحب بأسئلتك في اي وقت
بص يا سيدي انا كان ليا واحد اعرفه من بعيد ونفس ظروفك تقريبا
انت ان شاء الله ليك اعفاء مؤقت ويا ريت تمشي في اجراءاته دلوقتي احسن

الاجراءات بالتفصيل مش عارفها قوي لكن انت ممكن تتصل باداره التجنيد التابعه ليك واسألهم على الورق بالضبط وهما حيقولولك
وانا كاتب ارقام كل ادارات التجنيد في موضوع مستقل ممكن تدور عليه

بس الشئ الاكيد انك طبعا حتحتاج تعمل قيد عائلي وشهاده تثبت موضوع الطلاق وشهاده ميلاد ( غالبا كمبيوتر ) ليك ولوالدك
ومش حتحتاج تجيب والدك معاك لاداره التجنيد ( على الاقل صاحبي وقتها محتاجش يجيب والده ولا حاجه )

وبالنسبه للبطاقه لازم يا ريس تجددها عشان انت حيطلب منك صورة بطاقه يمكن كزا مرة وده معناه صورة وش وضهر طبعا فحتى لو عدت على موظف واحد ممكن متعديش على موظف تاني وساعتها ممكن تضطر تعيد اجراءات العفاء المؤقت من اول وجديد

والموضوع ده فيه معلومات عن تجديد البطاقه
http://eltagnid.blogspot.com/2009/10/blog-post_03.html

وانا سعيد بكومنتاتك في المدونه يا ريس :D

محمد يقول...

الله يخليك يااحمد انا تعبتك معايا وعندى استفسار اخير

هل صحيح انى لو قدمت فى التجنيد عادى ولاقدر الله لبست جيش ممكن وقتها اقدم ورقى التانى اللى يثبت انى مستحق التأجيل زى ان والدى عدى ال 60 سنة او ان والدتى مطلقة؟

لان فيه ناس قالتلى قدم عادى لانك ممكن تاخد تاجيل ولو مخدتش تاجيل ولبست جيش يبقى ممكن وقتها تقدم ورقك التانى اللى يثبت انك مستحق للتاجيل زى ان والدك معدى ال 60 سنة او ان والدتك مطلقة

admin يقول...

هو ممكن بس انا لا احبذ كده خالص عشان ممكن الموضوع يتأخر شويه وتضطر تتعذب شويه في الاجراءات او حتى تدخل الجيش اسبوع ولا حاجه لحد ما ورقك يخلص !

فرأيي انك تمشي في الاجراءات دي من الاول وملوش لازمه تستنى الكشف الطبي والارجه وكل الكلام ده
وفي النهايه الرأي الاول والاخير ليك طبعا يا باشا

محمد يقول...

ازيك يا احمد باشا

انا النهاردة كنت فى مكتب التجنيد فى قسم العطارين (نقطة شريف سابقا ) والعسكرى قالى هاتلى الاول حاجة اسمها تحديد موقف من التجنيد من المديرية الجديدة وعلى فكرة شرط القيد العائلى اتلغى السنة دى

انا قولت اقولك علشان لو عايز تعدل حاجة فى الموضوع علشان انا استفدت من مدونتك ولازم كمان احاول افيدك علشان تفضل مدونتك هى الافضل فى التجنيد

admin يقول...

تمام الف شكر يا محمد
جزاك الله كل خير
وكل سنه وانت طيب :D

غير معرف يقول...

لو سمحت هوة ضغط الدم المنخفض بيطلع من الجيش؟

admin يقول...

لا للاسف مبيطلعش من الجيش
الناس اللي ضغطها عالي هي اللي بتتحول للجنه طبيه عليا في القاهره
لكن مشوفتش للاسف اي حد ضغطه واطي بيتحول للجنه الطبيه العليا
ان شاء الله تطلع من الجيش لأي سبب تاني :D
بالتوفيق وكل سنه وانت طيب

غير معرف يقول...

عندي استفسار ارجو إن حضرتك تفيدني فيه ..

أنا مواليد 4/9/1985م
عندي ألم في الخصيتين ولما كشفت عند دكتور كبير عندنا طلب مني شوية تحاليل وأشعة، وبعد الاطلاع عليها بلغني إنى لازم أعمل عملية دوالي في الخصيتين، هل ممكن لو عملت العملية دي أطلع من الجيش؟

ولو فرضاً معملتهاش إلا بعد الالتحاق بالجيش؛ هل من الممكن إني اعملها وأعيد الكشف الطبي واطلع من الجيش؟

admin يقول...

بص يا غالي
انا حقولك اللي اعرفه :
مبدأيا لو انت دخلت الجيش وكان المفروض انك متدخلهوش اما لعذر طبي او ايا كان السبب ساعتها بتطلع من الجيش حتى لو كنت خلاص دخلته بس ساعتهاعمليه خروجك من الجيش ممكن تطول شويه وممكن متكونش في التو واللحظه فاهمني ؟

بالنسبه للدوالي للخصيه اللي اعرفه انها ممكن تنزل الظابط لعسكري لكن موضوع انها تطلعك تماما من الجيش بصراحه مش متأكد لأن الحالات الطبيه اللي تستدعي اعفاء نهائي اللي كانوا الدكاتره بيقولوهالنا في الكشف الطبي بصراحه مش فاكر ان كان فيها دوالي لكن غالبا لو دررجه الدوالي جامده فعلا الدكتور في الكشف الطبي حيحولك للجنه طبيه عليا في القاهرة وهناك هما اللي حيحددوا اذا كنت حتطلع من الجيش ولا تنزل لعسكري ده اذا كنت خلاص لا قدر الله لبست يوم الارجه

بالتوفيق واتمنى اكون افدتك شويه

غير معرف يقول...

أنا متشكر جداً على ردك، ولعندي استفسار تاني لو سمحت ...

أنا اللي كنت سألتك عن عملية الدوالي وكنت عايز اقولك إني إن شاء الله هقدم نص تاني لإني مواليد شهر تسعة .. واستفساري هو هل في رأيك اقدم للجيش قبل العملية ولا اعمل العملية قبل التقدم واجراء الكشف الطبي؟؟ .. يعني قصدي أيه اللي ممكن يفيدني أكتر في الخروج من الجيش؟؟ لإني قبل كده سمعت إن في حالات معينة محتاجة عمليات فبيقولوهم لو عملت العملية هتطلع ولو معملتهاش مش هتطلع

وكمان عندي حاجة تانية .. من سنة أو أكتر شوية وقع على إيدي اليمين لوح زجاج وعملت فيها عملية لكن العملية منجحتش أوي وحصلي تشوة ما في شكل اليد وأصبح صباع الإبهام لا استطيع ثنيه بالكامل ويؤلمني أحياناً لما اشيل حاجات ثقيلة، وقعدت أعمل علاج طبيعي فترة ولكن بدون فايدة .. هل ده ممكن يطلعني من الجيش؟؟

ووالله أنا مش عارف اشكر ازاي .. الله يكرمك دنيا وآخرة

admin يقول...

بص يا غالي :

بالنسبه لموضوع ايدك المفروض طالما انت عامل عمليه وفيه أثر للجراحه حسب اللي كان بيحصل قدامي كل دول كانوا بيتحولوا للجنه الطبيه العليا ( بمعنى أدق كشف الجراحه الاولي اللي بيكون في الكشف الطبي اخره بيحولك للجنه طبيه عليا ) وهناك في القاهره هما اللي بيحددوا اذا كنت تستحق اعفاء او تنزل لعسكري او حتى تكمل ظابط

لللأسف حالات طبيه قليله هي اللي بتاخد اعفاء على طول في الكشف الطبي الاولي ودي بتبقى حالات مفيهاش كلام او نقاش يعني مثلا وزن زائد او قصر طول او ناصور جامد اوي او ضعف نظر شديد وهكذا
كل الحالات التانيه اللي بيبقى فيها قولان زي موضوع الضغط والسكر والقلب والجراحه والكلام ده للاسف دكاتره منطقه التجنيد مبيقدروش ياخدوا القرار النهائي وغالبا بنسبه كبيرة اوي كل الحالات دي بتتحول للجنه طبيه عليا وهناك في القاهره هما اللي بيحددوا على حسب الحاله ودي ملهاش قاعده فاهمني ؟

بالنسبه لموضوع العمليه بصراحه خايف اقولك حاجه وتطلع غلط عشان مشيلش ذنبك وانا مش من النوعيه اللي بتحب تفتي فأنا حقولك رأيي بس انت بردك حاول تبقى تسأل في الموضوع ده تاني

رأيي والله اعلم الاحسن انك متعملش العمليه لحد ما تشوف نتيجه الكشف الطبي
بحالتك دي غالبا انت حتتحول للجنه طبيه عليا حسب وصفك كده كده سواء بعمليه او من غير
يبقى طالما تقدر تستحمل الفترة دي من غير عمليه انا لو مكانك حصبر واشوف هما حيعملواايه

اللي اعرفه ان طالما انت عملت العمليه يبقى ان شاء الله حاله الدواللي اللي عندك حتتحسن وساعتها احتمال خروجك من الجيش علشان العمليه حيبقى صعب

يبقى المنطقي تستنى لحد ما يكشفوا عليك بحالتك دي وتشوف اذا كانت الدوالي ممكن تطلعك ولا لأ فاهمني ؟
وممكن تتحول للجنه طبيه عليا بس تلاقي نفسك اخدت تأجيل زيي كده وان شاء الله ده ممكن يحصلك انت كمان
حتى لو لأسوأ الفروض لا قدر الله لبست وكشفت لجنه طبيه عليا وكمان لبست يبقى ساعتها حيبقى قدامك وقت لحد ما تدخل الجيش فعليا وفي الوقت ده ممكن تعمل العمليه وتقدم تظلم اذا كان ينفع تطلع من الجيش ولا لأ فاهمني ؟

اتمنى اكون افدتك وان شاء الله متحتاجش كل الوش ده وتطلع من الجيش من غير كل وجع الدماغ ده :D

محمد يقول...

انا الحمد لله اخدت اعفاء نهائى بسبب عدم اللياقة الطبية بسبب الوزن الزايد وكان عندى استفسار ياباشا

دلوقتى فى النقابة عندى محتاجين شهادة الاعفاء علشان اقدر اطلع الكارنيه

وانا عايز اعمل واحدة تانية علشان اخليها فى البيت

فممكن تقولى اعمل شهادة تانية ازاى؟ وايه مصاريفها؟

وشكرا ليك ياباشا

admin يقول...

الف الف مبروك على الاعفاء
بص في النقابه هما بيحتاجوا اما يبصوا على شهاده الاعفاء أو حياخدوا صورة منها لكن هما طبعا مش حياخدوا الاصل عشان يطلعولك الكارنيه فاهمني

بس عموما انت مش بينفع تطلع كزا شهاده اعفاء انت بتطلع واحده بس ولو محتاج تاني بعدها ممكن تطلع واحده تانيه بدل فاقد ( باعتبار ان شهاده الاعفاء بتاعتك كأنها ضاعت منك وانت محتاج واحده تانيه )
بس بصراحه مش فاكر التكاليف بس هي مش كتير عموما
بالتوفيق والف مبروك يا باشا

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB