الكشف الطبي - ملحوظات مهمه بخصوص الكشف الطبي

|


1- هنالك بعض الحالات في الكشف الطبي التي تستدعي اما اعاده الفحص او انزال الشخص الى لائق ب او حتى اعطائه اعفاء طبي

من أمثله تلك الحالات الطبيه :

أ- ضعف النظر
ب- حمى البحر المتوسط
ج- فلات فوت عظمي
د- مرض السكر
م- الالتهاب الكبدي الوبائي سي ( فيروس سي )
و- وجود كسور او شروخ كبيرة في العظام
ن- التصاق الفخذين
ل- الوزن الزائد
ر- قصر القامه او ان يكون الشخص قصير ( اقل من 160 سنتيمتر )
غ- ضغط الدم المرتفع
ق- مشاكل في الجهاز التنفسي او ما يسمى ب الازمه
س-مشاكل جلديه او وشمه غريبه او ما شابه
ش - عدم تطابق الفكين ( تسمى كلاس ثري) بحيث ان الفك السفلي مستواه الطبيعي امام الفك العلوي
ض- وجود ناصور

هذه هي الحالات المرضيه التي اتذكرها والتي لها دلاله في الكشف الطبي في الجيش سواء الكشف الطبي في التجنيد او الكشف الطبي في حلميه الزيتون و لكن ليس شرط ان تكون هذه الحالات هي كل الحالات المرضيه التي لها علاقه بالكشف الطبي
كما انبه مرة اخرى انه ليس معنى ان تكون عندك حاله مرضيه من تلك الحالات انك ستأخذ اعفاء طبي فربما تنزل لعسكري ( لائق ب ) فقط
اي ان الموضوع اولا وأخيرا في الكشف الطبي يعتمد على حالتك المرضيه

2- ملحوظه مهمه :

لمزيد من الشفافية يقوم قائد منطقه التجنيد بإخراج عدد من الاشخاص "10%من عدد المعافين نهائيا" وتوجيههم لإعادة الكشف الطبي مرة أخرى بالمجلس الطبي العسكري بالقاهرة ( الكشف الطبي في حلميه الزيتون ) وذلك حتى يكونوا متأكدين تماما ان كل هؤلاء الاشخاص يستحقون فعليا الحصول على اعفاء طبي

24 comments:

lido يقول...

السلام عليكم يريت حد يرد عليا انا كشفت الكشف الطبى وكلة مية مية بس متحول لجنة طبية عليا علشان عامل عاملية فى الفك ونفس يوم اللجنة هو هو نفس يوم الارجاء وانا مش عارف اروح انهى حتة فيهم الارجاء ولا اللجنة واية الاوراق اللى هخدها معايا فى اللجنة وهل احلق ولا لا

admin يقول...

طيب
معلش هو انت مترشح اساسا عسكري ولا ظابط

لو ظابط : يبقى لما تروح الكشف الطبي التاني وكشف الهيئه يبقى ساعتها حتقولهم على موضوع عمليه فكك وهما حيشوفوا وضعك ايه

لو انت عسكري يبقى حتروح في خلال اسبوع من يوم الارجاء لمنطقه اللجنه الطبيه التابعه لمحافظتك
( وغالبا حتبقى القاهرة والله اعلم ) وحتقولهم على موضوع فكك

يعني باختصار موضوع اللجنه الطبيه العليا مش حتستعمله قبل ما تسمع الارجه بتاعتك عشان لو انت كنت لبست لا قدر الله يبقى ساعتها حتعمل موضوع اللجنه الطبيه العليا
لكن لو اخدت تأجيل ان شاء الله ساعتها مش حتروح اساسا اللجنه الطبيه العليا فاهمني ؟

انت عرفت منين ان معاد اللجنه هو نفسه معاد الارجه ؟ المفروض ان ده مستحيل وعمره ما حيحصل
المفروض اللجنه بتبقى بعد الارجه ؟ هل انت متأكد ملييييييييون في الميه ان معاد اللجنه هو نفسه معاد الارجه ؟

عموما حتى لو افترضنا ان الاتنين في نفس المعاد ( وده شئ مستبعد حسب ما هما كانوا قالولنا وده اللي انا سمعته بنفسي ) يبقى ساعتها رأيي الشخصي انك تسمع الارجه بتاعتك وتشوف انت وضعك ايه
انا اعتقد انك فهمت غلط عشان معتقدش ان الاتنين حيبقوا في نفس اليوم
وتشوف وضعك لو حتدخل الجيش لا قدر الله يبقى تروح اللجنه الطبيه العليا

وبالنسبه للحلاقه:
في الارجه مش مهم خالص تبقى حالق ولا لأ
لكن في اللجنه الطبيه لازم للاسف تبقى حالق زي يوم الكشف الطبي

مستني ردك يا غالي وربنا معاك

عابر سبيل يقول...

السلام عليكم ورحمة الله وبركاته لو سمحت اخي الحبيب انا عندي مرض البواسير واريد ان اعرف هل هاروح الجيش ولا هاخد اعفاء رغم اني لسه معملتش العمليه ارجوا الرد السريع ولو علي البريد الالكترونيtito28282001@yahoo.com

غير معرف يقول...

السلام عليكم ورحمة الله وبركاته
اولا انا احب اشكرك جدا على المدونة الجميلة دي وكفايه اني اقولك جزاك الله كل خير لانك عملتها من باب انك تساعد جميع الشباب ومافيش اي مصلحة مادية من كده .
وكنت عايز اسألك سؤال :هل لو احد من الاقارب من الدرجة الاولى متزوج من امرأة من جنسية تانية يطلعني اعفاء
والاعفاء ده هيبقى سببه دواعي امنية يعني ممكن يعملي مشاكل ولا اتوكل على الله واقوله وخلاص
مع العلم اني عملت الكشف الطبي بتاعي خلاص ومستني الارجاء

admin يقول...

الاخ عابر سبيل :
بص مبدئيا البواسير كمرض مش شرط يطلع من الجيش لكن ممكن يطلع بردك
بمعنى ان الموضوع بيعتمد اساسا على رأي الدكتور وتشخيصه للحاله
قد تكون الحاله بسيطه وساعتها حتكمل لائق أ او لائق ب
وممكن تبقى الحاله جامده خصوصا لو انت بتقول انها محتاجه عمليه وساعتها ممكن تطلع من الجيش او بكتيره اوي تبقى لائق ب
حلاصه الامر عشان مطولش عليك الدكتور هو الشخص الوحيد اللي يقدر يحكم في الموضوع ده
وان شاء الله خير

admin يقول...

الاخ غير معرف
اولا انا سعيد ان المدونه عجبتك

ثانيا : بالنسبه لموضوع الجنسيه الاخرى
رأيي الشخصي انك تقوله للضابط والموضوع مش حيضرك
كده كده مش انت اللي متجوز من جنسيه اخرى يعني حاجه متعيبكش انت كشخصك بأي حال من الاحوال
لكن انا فاكر فعلا لما كان الضابط يوم الكشف الطبي في الصبح ورانا كام حاله كده مالهومش جيش و قالنا لو فيه اي حد شايف نفسه في حد منهم يقوله عليه
بس بصراحه محدش يوميها كان ليه قريب من الدرجه الاولى متزوج بأجنبيه وبالتالي معرفش بالضبط هل الموضع ده يطلع من الجيش ولا لأ
لكن في كلتا الاحوال انت مش خسران حاجه قول للضابط على وضعك وشوف هو حيقولك ايه

غير معرف يقول...

طب انا مرة اتبرعت بالدم و تحليل المستشفى اثبت ان عندى الاجسام المضادة لفيرس سى فيا ريت حضرتك تقوللى موقفى ايه بالضبط و شكرا

admin يقول...

لو لا قدر الله فيه فيرس سي :
مرضى الفيرس سي بياخدوا اعفاء وده اكيد مليون في الميه
لازم في الاول خالص تقول للدكتور ان عندك فيرس سي ويا ريت تكون جايب تحاليل دم تثبت كده

غير معرف يقول...

طب معلش سؤال كمان , اى دكتور بالضبط هو اللى المفروض اقوله ؟ يعنى فى انهى كشف ؟ الجراحة مثلا و لا ايه ؟ ولو مش معايا تحليل هل هما هياخدوا منى عينة يوم الكشف الطبى و لا فى حلمية الزيتون ؟ و هل المفروض اقوله يوم الكشف و لا استنى الارجه و اقول لو لبست ؟ معلش انا طولت عليك

admin يقول...

بص يا باشا في الاول خالص قبل الاربع كشوفات بيبقى فيه دكتور بيسأل على كام مرض اذا كان اي حد من الموجودين عندهم
فانت حتقوله على جنب ان عندك فيرس سي لا قدر الله وتشوف هو حيقولك ايه
غالبا حتضطر تكمل باقي الشكوفات عشان انا فاكر ان يوم الارجه بتاعي كان الظابط بينده على اي حد عنده فيرس سي عشان يقفوا في طابور لوحدهم ودول اكيد حيتعملهم فحص عشان يتأكدوا بنفسهم يعني حتى التحاليل مجرد اثبات قاطع عشان ممكن يتفبرك وبالتالي لازم هما حيعملولك تحليل
لكن هل التحليل ده بيبقى هنا ولا في حلميه الزيتون بصراحه معرفش

اهم حاجه زي ما قولتلك يا ريت انت تكون جايب حاجه تثبت وجود الفيرس واول دكتور تقابله تقوله وتشوف هو حيقولك ايه
وحتى لو خلوك تكمل الاربع كشوفات يبقى ساعتها لما ييجي العقيد الدكتور بعد الاربع كشوفات ويسأل اذا كان حد بيشتكي من حاجه اوحاسس انه اتظلم يبقى تقوله على الفيرس عشان ده اكيييد حيبقى فاهم وعارف ايه الحطوات اللي حتتم بعد كده

غير معرف يقول...

شكرا جزيلا عالرد و خصوصا حتة على جنب دى لانها مهمة قوى بس انا كنت بسال هل ممكن تاجيل الكلام ده لغاية يوم الارجه واشوف اذا كنت هلبس و لا لأ ؟ فلو لبست اقولهم و خلاص , و بعدين هل الكشوفات اصلا بيبقى فيها عينة ؟ سواء فى المبدئى او حلمية الزيتون للضباط ؟ لان ممكن واحد يكون عنده بس مش عارف . واسف على التطويل

admin يقول...

بص انا حقول وجهه نظري ووجهه نظرهم
بالنسبه لوجهه نظرهم هما دايما بيحبوا يأجلوا كل حاجه زي مثلا اللجنه الطبيه العليا او اي حاجه زي كده لحد يوم الارجه ويشوفوا هل انت لبست يبقى ساعتها بتكمل في سكه اللجنه الطبيه العليا او اجراءات الاعفاء
ولو اخدت تأجيل بيبقى خيييييير وبركه ومش حتحتاج تعمل اي حاجه فيها وجع دماغ ليهم زي مثلا التحاليل واللجنه الطبيه العليا والكلام ده

من وجهه نظري انا : لازم تقولهم في الاول وتشوف هل انت مثلا حتاخد ورقه من دكتور من عندهم تثبت وجود الفيرس او هل مثلا حتحتاج تاخد ورقه عشان تتحول للجنه طبيه عليا وبعد كده زي ما قولتلك انت غالبا كده كده اسااسا اي فحوصات زياده او لجنه طبيه عليا هما مش حيعملوهالك غير بعد الارجاء ويشوفواهل انت لبست وساعتها حتوجع دماغهم ولا انت اسااسا تأجيل ومش معاهم وبالتالي مش حيحتاجوا يعملوا فحوصات وكل الليله دي
وبيني وبينك ده منطقي فأكيد ايه الفايده من دفع تكاليف ووقت للفحوصات على شخص اساساا ممكن يكون حياخد تاجيل ومش حيبقى معاهم فاهمني ؟

لكن انت الصح انك تاخد اي دكتور على جنب او حتى اي دكتور من بتوع الاربع كشوفات وتقوله وتعرف هل فيه ورق معين حيطلبوه ولا هل انت حتمشي في سكه معينه غير باقي الناس عشان متجيش بعد كده لا قدر الله تكتشف انك في الارجه لابس مثلا وانك مش حينفع تعمل موضوع فيرس سي غير مثلا فبل الارجه
يعني عشان تبقى في الامان قولهم وشوف ايه الخطوات اللي هما حيقولولك عليها وايا كانت الخطوات دي غالبا كده كده بتتعمل بعد الارجاء لكن ده احتيااااط واجب ومهم

وبالنسبه لموضوع حلميه الزيتون انا معلش مش حعرف افيدك قوي لأن الحمد لله انا كنت اخدت تأجيل وبالتالي كل الاجراءات اللي كنت بقولها هي لحد يوم الارجه واستلام شهاده التاجيل لكن بعد كده في حلميه الزيتون والترحيل للسلاح والكلام ده بصراحه معرفهوش

اتمنى اكون افدتك

غير معرف يقول...

اكيد حضرتك افدتنى يعنى باختصار انا قدامى حاجة من اتنين : يا اما اكمل عادى يوم الكشف الطبى من غير ما اقول و بعدين استنى يوم الارجة فلو لبست اقولهم و الاحتمال التانى انى اعمل زى ما انت قلت واخد اى دكتور على جنب و اقوله وفهمت ان الاحتمالين متساويين , صح ؟
بس معلش فيه حتة مش واضحة و هى "عشان متجيش بعد كده لا قدر الله تكتشف انك في الارجه لابس مثلا وانك مش حينفع تعمل موضوع فيرس سي غير مثلا فبل الارجه " هل معنى الكلام ده انى لو لبست مش هطلع و لا ايه ؟ و هل التحويل للجنة الطبية بيكون يوم الكشف و لا الارجه و لا الاتنين ؟ و بعدين انا سألت على حتة قبل كدة هى ايه اللى المفروض يحصل لو انا مثلا كان عندى و ما كنتش اعرف ؟ معلش انا عارف و الله انى تقلت عليك

كريم اباظه يقول...

لو سمحت انا عندى موضوع الفك
فعايز اعرف منك
انت اخدت اعفاء طبى
افترض انى مخدتش اعفاء فى الارجاء او التاجيل هل موضوع الفك السفلى ده يطلعنى اعفاء طبى

admin يقول...

بالنسبه ليك يا غير معرف :
1 - حتة مش واضحة و هى "عشان متجيش بعد كده لا قدر الله تكتشف انك في الارجه لابس مثلا وانك مش حينفع تعمل موضوع فيرس سي غير مثلا فبل الارجه " هل معنى الكلام ده انى لو لبست مش هطلع و لا ايه ؟ و هل التحويل للجنة الطبية بيكون يوم الكشف و لا الارجه و لا الاتنين ؟

بص يا غالي الناس اللي المفروض تتحول للجنه طبيه عليا المفروض يوم الكشف الطبي بتاعها الدكتور ( اي واحد من الاربع دكاتره بتوع الاربع كشوفات ) على حسب حالتك هو اللي بيكتبلك انك المفروض تتحول للجنه طبيه عليا وساعتها حتستنى نموذج 110 وتختمه بختم مكتوب عليه لجنه طبيه عليا من هناك
بس انت فعليا مش بتتحول للجنه دي الا بعد يوم الارجه ويشوفوا اذا كنت اخدت تأجيل اساسا ومش حتحتاج للجنه الطبي ولا انت لبست وحتحتاجها

وبالنسبه لنقطه لو لبست مش حطلع :
زي ما قولت انت لو حتتحول للجنه طبيه عليا الكلام ده بيبقى معاده كحد اقصى اسبوع من يوم الارجه ( وكده كده مش حتتحول قبل يوم الارجه اساسا ) فعشان كده انت يستحسن تقولهم يوم الكشف عشان لو (انا بقول لو عشان مش متأكد للامانه ) موضوع فيرس سي يستدعي انك نموذج 110بتاعك يكون محتوم بختم اللجنه الطبيه العليا يبقى انت حتكون كده في السليم
طيب افرض انت لبست لا قدر الله وكان عندك فيرس سي حتطلع بردك بس ممكن الحوار ده يطول وتضطر تدخل الجيش اسبوع مثلا ولا حاجه لحد ما يدوك الاعفاء

انا مش عارف انت متخوف ليه للدرجه دي من موضوع انك تقول للدكتور الموضوع مش بالصعوبه اللي انت متخيلها صدقني وحتى لو ما عرفتش تقول اي دكتور على جنب يا سيدي في اي كشف من الاربع كشوفات بتبقى انت واقف لوحدك مع الدكتور ابقى اعمل الكشف بتاعه واسأله بخصوص الفيرس وهو اكيد حيقولك

واساسا انااللي اعرفه بخصوص فيرس سي عشان الامور بتبقى واضحه :
1- هما حياخدوا اعفاء وملهومش جيش
2-مش شرط اساسا يتحولوا للجنه طبيه عليا
انا اللي حصل قدامي انهم يوم الارجه الظابط نده وقال اللي عنده فيرس سي يقفوا في طابور لوحديهم
لكن هل هما اخدوا شهاده بكده قبل الارجه مثلا ولا هل هما حيتحولوا لجنه طبيه عليا اساسا ولا لأ ولا هل هما كان حيحللوا في يوم الارجه بمنتهى الصراحه معرفش عشان دول يوم الارجه انفصلوا عننا وانا معرفش ايه الاجراءات اللي عملوها لحد يوم الارجه بخصوص فيرس سي
وعشان كده انا لازلت بقولك قولهم يوم الكشف الطبي على فيرس سي وشوف هما حبقولولك ايه فاهمني ؟
معشل انا عارف اني مفيدتكش اوي بس والله بحاول افيدك على اد علمي


2- انا سألت على حتة قبل كدة هى ايه اللى المفروض يحصل لو انا مثلا كان عندى و ما كنتش اعرف ؟

كده كده لو كنت لابس لا قدر الله حيخلوك تعمل تحليل دم وساعتها نتيجته حتبين اذا كان عندك فيرس سي ولا لأ
ولو ثبت وجود الفيرس يبقى اكيد انت طالع من الجيش

admin يقول...

بالنسبه للاخ كريم اباظه :

موضووع الفك انه يبقى ما يسمى كلاس ثري او بمعنى ان الفك السفلي يكون متقدم ومش متطابق مع الفك العلوي
والموضوع بيعتمد على درجه عدم تطابق الفكين

انا بالنسبالي الدكتور كتبلي على لجنه طبيه عليا وقاللي ان انا غالبا حاخد اعفاء
لكن فعليا انا الحمد لله محتاجتش موضوع اللجنه الطبيه العليا عشان يوم الارجه دفعتي اخدت تأجيل

كده كده يوم الكشف الطبي ابقى قول لأول دكتور من الاربعة كشوفات ( كشف العظام ) وشوف هل هو حيحولك للجنه طبيه عليا ولا لأ

غير معرف يقول...

يا سيدى شكرا جدا على المعلومات و التعب معانا بس يا ريت توضح النقطة دى "كده كده لو كنت لابس لا قدر الله حيخلوك تعمل تحليل دم وساعتها نتيجته حتبين اذا كان عندك فيرس سي ولا لا" هل الكلام ده بيبقى حاجة روتينية لكل اللى هيلبس ؟ و هل للضباط بس و لا العساكر كمان ؟ و شكرا

admin يقول...

ايوه حاجه روتينيه لكله للضباط والعساكر كمان
وان شاء الله خير وتاخد تأجيل وتخلص من كل وجع الدماغ ده :D

كريم اباظه يقول...

شكرا على اهتمامكو ردك

غير معرف يقول...

شكرا جزيلا و الله على ردك واهتمامك واسمحلى بسؤال اخير امتى بقى بياخدوا عينة الدم دى و شكرا مرة اخرى

admin يقول...

العفو على ايه بس وربنا يوفقكم جميعا

وبالنسبه لموضوع سحب العينه اللي اقدر اقولهولك انها بتبقى بعد يوم الارجه لكن امتى بالضبط ده انت بتعرفه بعدين لو لبست لا قدر الله
بالتوفيق

غير معرف يقول...

لو سمحت هو ايه حدود ارتفاع ضغط الدم اللى بيطلع من الجيش؟ و هل فيه حاجة اسمها دقة زيادة؟ و شكرا

admin يقول...

لو عندك ضغط الدم عالي عندك بصورة مستمرة يبقى لازم تقولهم في الكشف اللي حيقيسوا فيه نبضك وقلبك
وساعتها حيقيسه فعلا مظبوط ولو عالي فعلا بتتحول لجنه طبيه عليا في القاهره عشان يتاكدوا فعلا انك مريض بضغط الدم وغالبا بعدها بتاخد اعفاء او على الاقل بتبقى لائق ب ( عسكري )

وهما على فكره الطبيعي انهم بيكروتوا بصراحه الكشف ده عشان قياس الضغط بجهاز الزئيق بيطول والعدد بيبقى كتييييير قوي فبيستسهلوا ويحاولوا يقيسوه من غير جهاز ( متسألنيش ازاي !!! ) وعشان كده لو عندك ضغط لازم تقولهم
بالتوفيق

غير معرف يقول...

أرجووووووووووووووووووكم الرجاااااء الرد
الكشف الطبي بتاعي يوم السبت الجاي 30 /10
وأنا عندي شرخ في الفقرة الرابعة في الضهر وبداية انزلاق غضروفي ومحتاج عملية تثبيت فقرات
وعندي كمان التهاب واختناق في عصب الكوع ومحتاج عملية نقل أعصاب ومعاي كشوفات وحوالي 12 أشعة هل الحجات دي تديني افعاء من الجيش ..؟
الرجااااء الرد

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB