دليل شاب التجنيد - حالات الاعفاء من الخدمه العسكريه

|

بعد ما اتكلمت عن اجراءات التجنيد بالتفصيل وكمان يوم الكشف الطبي ويوم الارجه ( يوم الارجاء )

  قررت ان : 

اكتب عن سلسله جديده من المعلومات المتعلقه باجراءات التجنيد والتي سوف يكون مصدرها موثوق منه جدا وهو ( دليل شاب التجنيد ) وهو الكتيب الذي استلمناه يوم الكشف الطبي في التجنيد وبالتالي غالبا كلامي اللي جاي واللي بعد كده حيبقى معظمه باللغه العربيه الفصحى وارجو انكم متكونوش متضايقين من لغتنا الحبيبه واول حاجه حنتكلم عنها وهي حاجه مهمه جداااااااااااااا :

الاعفاء النهائي : 

1- عدم اللياقه الطبيه لأداء الخدمة العسكريه والوطنيه 

2- الابن الوحيد لأبيه المتوفي 

3-الابن الوحيد لأبيه الغير قادر على الكسب نهائيا 

4-  اكبر المستحقين للتجنيد من اخوة أو أبناء المواطن الذي استشهد أو أصيب باصابه تعجزه نهائيا عن الكسب بسبب العمليات الحربيه 

5-  أكبر المستحقين للتجنيد من أخوة أو أبناء الضابط أو المجند أو المتطوع الذي يتوفى بسبب الخدمه التي أعجزته نهائيا عن الكسب

84 comments:

غير معرف يقول...

السلام عليكم
اولا بشكرك على المجهود الرائع ، انا عندى استفسرار لانى داخل على الجيش انا عندى رجلى فلات فوت وتاعبنى بقاله كذا سنة ودى حقيقة يعنى مش بقدر البس جزم مش بقدر اقف كتير معنتش بلعب رياضة نهائيا فهل ده يدى اعفاء من الجيش؟؟ ياريت حضرتك تفيدينى لو عندك معولمات انا الفلات فوت اللى عندى من النوع المرن او اللى بيقول عليه الجهلاء اللحمى وده طبعا كلام مش علمى ، هل ده يدينى اعفاء من الجيش ولو قالولوى انى لائق أعمل ايه؟؟ مع العلم طبعا ان لا يمكن البس فى رجلى بيادة

admin يقول...

ممممم
بص يا اخي
لو قريت كلامي حتاخد بالك ان انا كمان عندي فلات فوت مرن او لحمي وبردك رجلي بتوجعني من الوقفه الكتير
بس للاسف لما الدكتور كشف عليا وقولتله ان انا عندي فلات فوت لحمي قاللي انه ما بيطلعش من الجيش للاسف
لكن قد تكون حالتك اسوأ مني وممكن تاخد اعفاء بسببها او على الاقل تبقى مرشح عسكري لو لائق ب
المطلوب منك انك في كشف العظام ( اول كشف طبي ) حتقوله ان انت عندك فلات فوت وتشوف هو حيقولك ايه
بالتوفيق وان شاء الله اساسا متحتاجش تلعب على كارت الفلات فوت وتاخد اعفاء طبي بأي سبب تاني
صدقني انا ليا صحابي كتير اخدوا اعفاء بسبب حاجات غريبه هما ما كانوش واخدين بالهم منها اساسا
فمتقلقش وان شاء الله خير
بالتوفيق يا اخي

غير معرف يقول...

متشكر جدااا على ردك السريع ، بس والله انا حالتى حالة اساسا انا طالب فى كلية ورغم كده هروح الجيش بسبب اخطاء موظفين يعنى هروح بالثانوية عشان كده بحاول اتعلق بأى شىء ، بس فعلا الفلات فوت اللى عندى تاعبنى وبالنسبة للمرن أو مش مرن ده كلام طبعا بيضحكوا بيه على الناس عشان مرن أو مش مرن لما بتحط رجلك على الارض مش هيكون فيه أى فرق يعنى فى الحالتين هيكون وقفتك ومشيتك غلط ، بالنسبة للمشاكل التانية معتقدش عندى حاجة تانية هى رجلى بس اللى مبقتش بتشيلنى زى الاول ، طيب لو قالى انى لايق اعمل تظلم واروح حلمة الزيتون ولا اعمل ايه؟؟ ولو عندى حساسية جلدية ارتيكريا يعنى دى ممكن تفرق معاهم؟؟؟ اسف انى طولت عليك بس فيه عسكرى اقترح عليا اروح بدقنى يا ترى لو عملت كده هتبهدل؟؟؟ يعنى بهدلة الجيش مهما كانت مش هتكون زى بهدلة امن الدولة ياريت تفيدنى ومتشكر مرة تانية على ردك السريع

admin يقول...

لا لا لاااااااااااااااااااا
متروحش بذقنك خالص خااااااااالص
اديك قلتها بهدله الجيش ولا بهدله امن دوله
ده غير ان الناس هناك مبيفهمووووووووش يعني من الاخر حتى لو روحت يوم الكشف الطبي حيبقى قدامك حلين
1 - الظابط حيسلمك لامن الدوله وهناك يعني نقدر نقول ان فيه حاجات مش لطيفه حتحصل ونكتفي بهذا القدر
2- الظابط حيخللي الحلاق يحلقهالك غصب عنك وطبعا ساعتها حتتعامل اسوأ معامله من العساكر وحتى دكاترة الكشف الطبي

بالنسبه للارتيكيريا انا بصراحه معرفش اذا كانت بتطلع ولا لأ بس ممكن اوي تسأل هناك اي دكتور من بتوع الكشف الطبي سؤال عابر وبطريقه لطيفه متستفزهوس اذا كانت تلك الحساسيه ممكن تخرجك من الجيش ولا لأ
انا قبل كده واحد صاحبي طلع من الجيش عشان عنده وحمه غريبه خافوا انها تبقى معديه
وواحد عشان تقوس الساقين وواحد عشان ايده بتعرق كتير !!!
يعني صدقني الواحد بيروح وممكن يلاقي نفسه طلع من الكشف الطبي على حاجه هو مش متوقعها واساسا لسه فيه الارجه والمواليد اللي ممكن تطلعك زي ما طلعتني انا كمان فاهمني ؟
عموما عشان متتوهش مني : لو لا قدر الله اتاخدت في الجيش ومطلعتش اعفاء طبي ممكن تقدم تظلم عادي جداوتروح حلميه الزيتون
وان شاء الله خيييييييير

ده اولا
اما بخصوص حتعمل ايه لو لا قدر الله اتاخدت حتقوم ساعتها مقدم تظلم وده من حق اي مواطن مصري انه يقدم تظلم في حلميه الزيتون وهناك هما حيحكموا اذا كان تظلمك صحيح ولا لأ

غير معرف يقول...

السلام عليكم والله مش عارف اقولك ايه ربنا يكرمك واسف لو بتعبك معايا ، بس سبب قلقى ده ان الموظف هناك قالى ملكش تأجيل يعنى حتى لو الدفعة اللى رحت معاها اخدت تأجيل أنا هلبس ومتسألنيش عن السبب لانى مقدرش افهم طبعا ، انا عمرى ستة وعشرين سنة ومبقتش عارف اعمل ايه اروح الكشف الطبى واتوكل على الله ولا مرحش خالص ، عشان كده الواحد عمال يفكر فى اى حاجة ممكن تطلعه طيب سؤال ولو غبى شوية انا ضروسى تعبانة بمعنى الكلمة لدرجة ان من كام سنة خلعت ضرسى وباقى الضروس بايظة دى حاجة ممكن تهمهم ولا تستفزهم لو قلتلهم عليها؟؟؟؟ ، طيب لنفرض أنه قالى انت لائق وقلتله اساسا انا مش بلبس جزمة وكل الدكاترة قالوا لا يمكن البس بيادة وقتها اعمل ايه؟؟؟ يعنى اقوله مثلا ازاى هلبس بياده برجلى دى؟؟ ولا اتريق عليه واقوله خلاص هاتولى بيادة طبية ، والله الواحد حيران ومبقاش عارف يعمل ايه ، واسف مرة تانية انى شغلتك معايا

admin يقول...

يا غالي ولا يهمك انا تحت امرك
بص بالنسبه لموضوع الضروس للاسف مالوش علاقه ومالوش لازمه تقول للدكتور عشان ده حيستفزه

بالنسبه لموضوع سنك ( اللي فاهمه من كلامك انك كبير عن دفعتك ) بردك اللي قالك ان حتى لو دفعتك اخدت تأجيل انت مش حتاخد ده اكيد بيفتي
السن مالوش علاقه اذا كنت كبير ولا صغير بالنسبه لدفعتك
انا مثلا دفعتي اخدت تاجيل من مواليد 80 لحااااد 87 يعني الناس اللي اكبر مننا اخدوا تأجيل بردك مع الدفعه وفي نفس الوقت الناس الاصغر مننا 88 كان حظهم وحش ولبسوا جيش ( وطبعا الكلام ده مش قاعده )
يعني موضوع اختلاف سنك عن سن دفعتك مالوش علاقه اساسا
والارجه هي اللي بتتحدد ممكن تلبس لا قدر الله او لأ

بالنسبه لرجلك زي ما قولتلك يا غالي من غير تريقه على الدكتور ولا حاجه
لو افترضنا انه مهتمش او ماخدش باله انك عندك فلات فوت قولله انك عندك فلات فوت ومبتعرفش تقف والدكتور منعك انك تلبس جزم عشان مبتعرفش تقف وشوف هو حيقولك ايه
لو افترضنا انه مهمتمش يبقى مالكش حل غير انك تقدم تظلم في حلميه الزيتون

موضوع انك تهرب من التجنيد مش عارف بصراحه بس منصحش بيه ياعني ااساسا اي شغل بيسأل على موقف التجنيد واحساسك انك تبقى هارب ومعرض في اي وقت انك تتمسك وحتفضل بالاحساس ده لحد ما سنك يعدي ال 30 ده غير انك بعد ال 30 بردك حتحتاج تقريبا محامي عشان فيها قضيه على ما اعتقد ( بس مش متأكد اوي من النقطه دي للامانه ) يعني كل ده عشان الجيش

عموما هي دي حاجه براحتك وبتختلف من شخص للتاني بس انا بصراحه معنديش استعداد اتحمل كل القرف ده عشان خاطر الجيش بس كل واحد ظرروفه بتختلف عن التاني و ده مصيرك وانت اللي بتحدده بس لو عايز نصيحتي روح الكشف عادي ممكن تطلع من الجيش اساسا ومتحتاجش كل القرف ده
وربنا معاك يا غالي

غير معرف يقول...

والله انا مش عارف اقولك ايه انتى بتحرجنى بذوقك انا معرفش اسمك عشان اشكرك باسمك ، ربنا يكرمك ان شاء الله ، هو الموضوع مش موضوع سنى الموضوع ان السنة اللى فاتت انا حولت من كلية لكلية التانية والكليتين وافقوا على تحويلى وكذلك الجامعة وبعد ما حولت ودخلت امتحانات التيرم الاول جم فى التيرم التانى ومنعونى من دخول الامتحانات بحجة ان الجيش رفض تأجيلى ، المهم بقالى سنة فى المشكلة دى ومحدش بيفيدنى فى حاجة فى منطقةالتجنيد بكل بساطة يقولى اتجند بالثانوية وفى النهاية عرفت يعنى ان ماليش تحويل رغم ان مفيش حاجة فى قانون التجنيد تقول ده ولا حاجة فى دليل التحويلات الجامعية تقول ده لكن فى النهاية عرفت ان بعد سن اتنين وعشرين سنة مينفعش الطالب يحول الا مرة وحدة تقولى ازاى بقى الكليتين وافقوا على تحويلى وازاى مركز التحويلات فى الجامعة حولنى اقولك ده اللى هيجننى ، فعشان انا اساسا فى مشكلة مش ناقص الجيش كمان وعلى فكرة انت حاسس بالشباب ومشكلة الجيش اوى انا عموما مقدرش اروح الجيش باى شكل من الاشكال اولا لانى مش بتحمل اى اهانة اى كان نوعها او صاحبها خصوصا لو جت من حد له سلطة عاليا ثانيا ان انا مقدرش اضيع سنتين من عمرى وفى نفس الوقت محدش هيصرف عليا وانا فى الجيش ، معلش بتعبك معايا بس حبيت اشرحلك موقفى عشان تعرف ليه انا بحاول اطلع من الجيش باى شكل ، المهم فى حالتى دى الموظف بيقولى ان انا ماليش تأجيل أقوله ليه ميفدنيش فى حاجة ، وفعلا معاك حق اساسا انا عايز اخلص من الجيش عشان اقدر اشتغل شغل كويس واقدر اسافر ، يارب مشكلة رجلى دى تكون سبب فى الاعفاء لان هى بجد من غير جيش ولا حاجة تعبانى
ومتشكر جدااااااااااا وربنا يكرمك على تعبك معايا

admin يقول...

العفو يا غالي
و متقلقش ان شاء الله ياااااااااااا رب تطلع من الجيش وتشوف حالك وتكون نفسك
انا فعلا مقدر موقفك وانا نفسي بمنتهى الصراحه يوم ما اخدت تأجيل في الارجه حسيت ان انكتبلي عمر جديد بأمانه
خصوصا اني كنت مترشح ظابط يعني 3 سنين كمان
:D

غير معرف يقول...

السلام عليكم
انا اخي العزيز عملت تاجيل مرتين وذلك لاني الابن الوحيد للاب الحي ، ووالدي توفي وانا مسافر ، ولازم علشان اسافر اعمل تصريح سفر فهل لو رحت ليهم يعطوني شهادة اعفاء نهائي خصوصا انا سني حاليا 31 سنة ، وما هي الاوراق المطلوبة .... شكرا لك

admin يقول...

وعليكم السلام ورحمه الله وبركاته
اولا البقاء لله وربنا يصبرك

ثانيا : انت كده من حقك تاخد اعفاء نهائي طبعا خصوصا ان سنك عدى ال 30 سنه
بالنسبه للاوراق هي غالبا حتبقى اكيد صورة من البطاقه بتاعتك وشهاده الوفاه بتاعه الاسره وشهادات التأجيل اللي انت اخدتها واحتمال كمان يطلبوا القيد العائلي
عموما لو عايز تعرف الورق بالضبط
اتصل برقم منطقه التجنيد اضمن
والارقام في الموضوع ده
http://eltagnid.blogspot.com/2009/10/blog-post_9185.html

احسن عشان تبقى متأكد اكتر ومتروحش المشوار على الفاضي
بالتوفيق يا غالي

غير معرف يقول...

انت غير عادي ماشاء الله عليك جزاك الله خيرا
بس لي طلب عندك هو مش طلب هو رجاء
لو تعمل مدونات لاغلب المصالح الحكومية وحتى تحط فيها تجاربك الشخصية وعلاوة على تجارب الاعضاء هما كمان واحدة واحدة تعملك قاعدة بيانات ممتازة في المصالح الحكومية
وصدقني اهم ميزة عندك مش في المواقع الحكومية هي سرعة الرد
وعامة جزاك الله خيرا

غير معرف يقول...

وعلى فكرة اتصلت عليهم ونفس الكلام اللي انت قلته بالضبط
شهادة التاجيل الاخير + شهادة الوفاة + القيد العائلي + صورة شخصية
شكرا لك

admin يقول...

هههههه
والله بجد انا اسعدني كلامك جداااااااا
وربنا يخليك يا غالي

وانا فعلا بفكر اوي في كلامك ده و ان شاء الله وعد مني اي اجراء حكومي اعمله ححطه في المدونه هنا وان شاء الله لما اكتب عدد مناسب من الاجراءات الحكوميه التانيه حبقى اعملها مدونه منفصله
بس همتك معايا يا ريس انت لو عملت اي اجراء حكومي تبقى خدمتنا اوي لو كتبته ككومنت وانا اخليه موضوع مستقل باسمك
وهي فعلا فكرة ممتاااااااازة احييك عليها وان شاء الله نطبقها قريب
والف مبروك على الاعفاء مقدما ان شاء الله يا غالي
بالتوفيق ودمت بكل ود

أبو هاجر يقول...

أنا عن نفسي مفيش مشاكل بس يمكن مش هفيد قوي
بس عامة على اد ما اقدر لاني اصلا مقيم بالسعودية
بس برضة تصدق انها ميزة من ناحية الاخوة المصريين بالخارج او بالسعودية تحديدا يقدروا يعرفوا برضة اللي عايزينه في حاجات كتيرة هناك اقدر انشرها هنا في الموقع
وعامة انا خلاص خلصت شهادة الاعفاء والحمد لله
وبعد كده هروح اعمل الختم على الجواز ثم تصريح العمل وكل ده هقول عليه هنا في مدونتك ان شاء الله

admin يقول...

بجد يبقى جزاك الله كل خيييييييييير يا ابو هاجر لو قدرت تعمل كده كده
وربنا يوفقك يا غالي

أبو هاجر يقول...

السلام عليكم ورحمة الله وبركاته
الأخوة اللي زي حالتي اخدوا اعفاء نهائي ( الشهادة الحلوة ) وعايزين يخدوا الختم المثلث ...
يروحوا الجوازات الخاصة بيهم معاهم الآتي :
1- الجواز الأصل + صورة من الجواز .
2- شهادة الإعفاء + صورة منها .
3- طابع دمغة بقيمة 1 جنيه فقط لا غير .
طبعا انا لسة معملتش كده بس هروح بكرة ان شاء الله ولو فيه شيء هقولكو عليه ان شاء الله ..
بس حبيت اشارك مش اكتر ولا اقل

admin يقول...

تمام يا غالي ومستنيك بكره ان شاء الله عشان نعمل موضوع منفصل عن ازاي تاخد الختم الثلاثي وان شاء الله تاخده بكره وتكون الاجراءات سهله وتتم بسهوله

غير معرف يقول...

أخى الفاضل انا اللى كلمتك قبل كده فى موضوع الكشف الطبى انا رحت عملت كشف طبى المهم الدكتور اللى شافنا فى الاول قلتله على رجلى أنى مش بقدر البس جزم فيها او اقف عليها قالى امشى كده وكتبلى ملاحظة فى خانة العظام كاتبلى
observed gait
يعنى معنى الكلام ان لقى حاجة غلط فى مشيتى ودى حقيقة وقالى تعالى تانى يوم عيد كشف العظام
رحت تانى يوم وبعد عذاب جه دكتور العظام مر علينا بقوله رجلى كذا لسه مكملتش كلامى قالى اقف كده بص على رجلى وكتبلى لائق على طول ، معنتش عارف اعمل ايه خصوصا ان هما عاملينى سنة زيادة يعنى ماليش تأجيل ، خايف أعمل تظلم فى حلمة الزيتون برضه يدونى لائق معنتش عارف اعمل ايه اخى الفاضل لو عندك أى معلومة ياريت تفيدنى بيها

admin يقول...

لا حول ولا قوه الا بالله
معلش يا اخي ملهاش حل غير تظلم في حلميه الزيتون وخلاص للاسف
انا كنت فاكر ان الدكتور حيكتبلك غير لائق حسب وصفك لرجلك لكن للاسف منفعش
مفيش غير التظلم للاسف وربنا معاك

غير معرف يقول...

متشكر على ردك المشكلة دلوقتى ان انا خايف اخد خطوة التظلم دى خايف يدونى لائق هو لو ادونى لائق فى حلمية الزيتون ماليش انى اتظلم تانى؟؟؟؟؟؟؟

admin يقول...

يا غالي مهو انت كده كده اخدت لائق خلاص
يعني لو ما قدمتش اي تظلم حتروح للتجنيد خلاص وتستلم سلاحك في الوقت اللي متحددلك ( مش انت بتقول انك مالكش ارجه اساسا وانك كده اخد سنه زياده ؟ لو كلامك صح يبقى انت خلاص للاسف حتدخل الجيش فعليا وبالتالي يفضل انك تعمل خطوة التظلم دلوقتي )
لكن لو كان لسه ليك ارجه يبقى تستنى لحد لما الارجه تظهر فهمتني ؟
بالتوفيق ان شاء الله

غير معرف يقول...

معلش يا غالى تعبتك معايا
ايوه انا عندى سنة زيادة للاسف ، بس مش عايز اعمل التظلم اللى لما اكون واثق انا هاعمل ايه، لان انا شفت بعينى عكس الكلام اللى الناس بتقوله ان الدكاتره مش بتهتم بالتقارير والاشاعات بالعكس هناك مش بيعملوا حساب غير للى معاه اوراق تثبت حالته لان الدكتور للاسف مكنش بيشوف حاجة بعينه غير بمستند مع الشخص ، فانا مش عارف لما اروح اعمل التظلم اخد معايا اشاعه للرجلى ولا اعمل ايه ، وعندى كسر فى صباع رجلى الكبير والتئم غلط وبيعملى برضه مشاكل ، يعنى بامانة قبل حتى موضوع الجيش ده انا بالفعل عندى مشاكل فى رجلى ومستحيل برجلى دى البس بيادة ، اسف يا غالى ازعجتك معايا بس سنتين ونص جيش فى سنى ده حررررررررررام ولا انت مش موافقنى الرأى

admin يقول...

انا موافقك طبعا وفاهم ان اي لحظه في الجيش حرام
دي سنه العسكري اساسا لوحدها عذاب ووالله مقدر شعورك جدا

بس انا ما زلت عند رأيي لازم تعمل تظلم ويفضل تكون عامل اشعه وتاخد اي اثبات ان حاله رجلك سيئه وختعوقك عن دخول الجيش وروح بالورق ده في حلميه الزيتون وقدم التظلم
للاسف مفيش خل تاني غير انك تهرب من التجنيد وده منصحش بيه خاااااااالص طبعا

غير معرف يقول...

ايوه اكيد ان شاء الله هعمل تظلم بس بحاول اجمع اشعة وورق يثبت صحة كلامى بحيث ان عايز اروح وانا واثق من النتيجة هناك ، وعلى فكرة بينك وبينك يعنى ومحدش شايف كلامنا خالص هههههههه هو فيه طرق تانية بتطلع من حلمية الزيتون بس بفلوس كتيييييييييييير وطبعا الخيار ده مقدرش عليه ، انا البارحة عملت اشعة والنتيجة طلعت
2nd grade falt foot
يعنى فلات فوت من الدرجة التانية ، ومجرد مشوارى لعيادة الاشعة رجعت مش قادر ادوس على رجلى
ادعيلى يا اخويا ربنا يعتقنى من القرف ده ، انا من النوع الهادى جداااااا واللى بيحترم الناس جداااااااا تصور النوع ده ممكن يحصله ايه فى الجيش هههههه خصوصا ان انا مع احترامى ده للناس مطقش حد يرفع صوته عليا او يغلط فيا ، ده انا من اللى شفته بس فى الكشف الظبى وازاى بيذله العيال ههههههه كنت هعمل جريمة

admin يقول...

هههههههههه
ربنا معاك يا غالي
وباذن الله متضطرش تدخل الشئ البغيض اللي اسمه الجيش ....... اميييييييييييين

غير معرف يقول...

اخى العزيز استفسار اخير وعارف انى طولت عليك جداا
دلوقتى انا اخد سنة زيادة يعنى ماليش تأجيل من حقى اعمل تظلم دلوقتى ولا لازم يوم الارجاء؟؟؟ خصوصا ان منطقة التجنيد فى محافظة تانية وانا ناوى اسافر بكره عشان اعمل التظلم بس عايز اتأكد ممكن يطلع دلوقتى ولا استنى يوم الارجاء

admin يقول...

بص هو انا لما كنت مترشح ظابط ساعتها قالولي لازم تستنى الارجه عشان تعمل تظلم وقت كش ف الهيئه لو لبست
لكن لو عسكري يبقى تعمل تظلم من دلوقتي

وبالنسبه لحالتك واضخ انك مترشح عسكري واخد سنه زياده وحسب كلامك انك متاكد انك مالكش ارجه يبقى في الحاله دي ممكن تعمل تظلم دلوقتي
الفكرة ان التظلم بيخبوا يخلوه بعد الارجه هو انك ممكن اساسا تخرج من الجيش ومتدخلهوش وفقا للارجه وبالتالي حيبقى غباء خوض اجراءات التظلم وانت اساسا ممكن اوي ما تحتاجهاش
لكن بما ان في حالتك انت انك مالكش ارجه اساسا وفقا لكلامك فبالتالي يبقى ممكن تعمل التظلم دلوقتي
وعموما احتياطي ممكن تتصل بيهم في منطقه التجنيد بتاعتك وتتأكد احتياطي ولاون العقل يقول انك ممكن تعمل تظلم دلوقتي عادي مفيهاش مشكله
وربنا معاك وابقى طمني عملت ايه في نتيجه التظلم

غير معرف يقول...

هههههههههه حبيبى احب ابشرك تحيا مصر هههههههههه
رحت النهارده عشان اعمل تظلم قالولى فى الكوميسيون رحت لقيت الدكاترة الشباب دول سالتهم قالولى ماهو عشان تروح مصر لازم الدكتور اللى هنا هو اللى يبعتك قلتلهم ازاى يعنى انا عايز اعمل تظلم قالولى لازم تدخل لنفس الدكتور وهو اللى يبعتك المهم فى النهاية يعنى ودونى لنفس الدكتور اللى كتبنى لائق المرة اللى فاتت الله يحرقه دنيا واخره
تصورى يقولى ايه رحتله بتقرير طبى وبتقرير اشعة عملتها من كام يوم
مكتوب فى تقرير الاشعة يعنى دكتور الاشعة اللى انا مشفتووش اساسا كاتب فى تقرير الاشعة ان انا عندى فلات فوت درجة تانية
العبقرى بتاع الجيش ده بقى يقولى انت مش عندك فلات فوت خالص شفت مصرررررر؟؟؟؟؟؟ تعرف هو ممكن يقولى اللى عندك ده مش هأثر عليك او ممكن يقولى الكلمة المتخلفة بتاعتهم اللى هى ليس ليها اساس من الصحة فى اى مكان فى العالم يقولى اللى عندك مش عظمى مثلا ، لكن ده نفى ان عندى فلات فوت اساسا وكتبلى على جواب ميه وعشرة لائق عظام هههههههههه خلانى امشى مش شايف قدامى وكمان خلانى امشى اشك فى نفسى هو انا بمثل ان عندى فلات فوت بقالى سنين ولا الالام اللى عندى فى رجلى من سنين دى مش موجودة هههههههه الله يحرقه بكده بقى معنتش عارف اتصرف ازاى ،سالت العسكرى على البوابة قالى من حقك تتظلم بعد يوم الارجاء قلتله ماهو كتبلى لائق قالى تقدر برضه تتظلم والله انا مبقتش عارف اعمل ايه ،
انا اساسا دكتور قالى ممكن نعملك عملية نصلح رجلك شكلى هروح اعملها عشان اريح بتوع الزفت الجيش دول بس مش عارفة وقتها هيكون موقفى ايه

admin يقول...

لا حول ولا قوة الا بالله
بصراحه مش عارف اقولك ايه
معلش وربنا يعينك

غير معرف يقول...

هههههههه متقولش حاجة قول تحيا مصر ثلاث مرات ههههههههه بجد نفسى اتخلى عن حنسيتى الزفته دى ههههه المشكلة مش عارف ازاى سؤال بيطرح نفسه ايه الميزة ان الواحد يكتب فى باسبوره مصرى؟؟؟؟؟؟ لو شايف أى ميزة قولى هههههه

غير معرف يقول...

ازيك يا غالى من بقالى كام يوم مأزعجتكش البارحة بقى رحت لدكتور عظام محترم فى الاسكندرية ومن غير ما اقوله حاجة عرف القدم المصابة عندى ، المهم هو فيه جراحة ممكن تتعمل يا ترى انا لو عملت الجراجة دى هيكون موقفى ايه فى الجيش؟؟؟

admin يقول...

انا تمام الحمد لله يا باشا
انت طلعت اسكندراني زيي ههههه
اولا مفيش ولا ازعاج ولا حاجه
ثانيا
انا اول مرة اسمع عن جراحه بتعالج الفلات فوت ؟!
عموما لو الجراحه دي حتحل مشكله رجلك يبقى خلاص اعملها طالما للاسف انت كده كده داخل الجيش ومفيش اي تظلم نافع يبقى على الاقل متتعذبش بخصوص رجلك هناك صح ولا ايه ؟
وربنا معاك يا غالي
وبصراحه انا مش حكدب عليك انا حاسس ( ومش متأكد طبعا ) ان حتى الجراحه مش حطلعك من الجيش للاسف واضح ان هما عايزينك عايزينك ههههههه مش عارف ليه ؟ هو انت بتلعب جيم وعايزين يودوك الصاعقه ولا ايه :D

غير معرف يقول...

لا يا سيدى انا مش اسكندرانى بس عاشق الاسكندرية وناوى اعيش هناك ان شاء الله وبفكر اعمل مشروع هناك ،
هما فعلا كانوا هيخدونى الصاعقة معرفش انا قلتلك ولا لا هههههه عشان تبقى كملت ظابط اختارنى من كل الدفعة اللى كنت معاها وكان معايا اربعة وكان هياخدنى الصاعقة او حرس جمهورى اعتقد بس انا مش جسمى كبير ولا حاجة بس ميزتى الوحيدة ان جسمى مظبوط يعنى لا كرش ولا اى حاجة ووزنى مع طولى مظبوطين
يا عم لالالا عملية ايه اعمل عملية وكمان ادخل الجيش؟؟ طظ فى مصر ، انا هاعمل العملية فى حالة وحدة لو هطلعنى من الجيش

غير معرف يقول...

انا متجوز وانا طالب هل سادخل الجيش

admin يقول...

اولا مبروك على الزواج
بص فيه قاعده في الجيش
انك اذا كنت العائل الاساسي للاسره يبقى مالكش جيش
وده اللي يخللي الابن الاكبر اللي ابوه غير قادر على الكسب ياخد اعفاء
وبالتالي المفروض انك انت العائل الاساسي للاسره بتاعتك ( زوجتك ) والمفروض مالكش جيش
بصراحه مكانش فيه حد معايا متجوز وهو طالب وبالتالي مضمنلكش كلامي
لكن نص القانون واضح وغالبا بنسبه اكبر من 90 % انت ان شاء الله اعفاء ابقى بس جيب معاك عقد الزواج او صورة منه ووريهالهم عشان تثبت انك العائل الاساسي للاسرة بتاعتك
وبالتوفيق

غير معرف يقول...

ما هى خطوات الحصول على الإعفاء المؤقت

غير معرف يقول...

لو سمحت سؤال مهم جدا ,هل لو اخذت اعفاء طبى هل الشهادة بيكون فيها السبب بالتفصيل ؟ اصل ممكن تكون محرجة شوية و شكرا

admin يقول...

لأ مبيكونش مكتوب فيها السبب

غير معرف يقول...

لو سمحت هى تينيا القدم بتطلع من الجيش ؟

admin يقول...

ممممم للأسف لأ على حد علمي والله اعلم

غير معرف يقول...

هل ضربات القلب السريعة 114 ضربة فى الدقيقة
او عيب خلقى فى القلب بس مباخدلوش ادوية يطلعو من الجيش ولا لا؟؟

انا طولى 175 ووزنى 55 هل دى تعتبر نحافة ولا هى بتتقاس ازاى؟

وشكرا

admin يقول...

اولا كل سنه وانت طيب بمناسبه العيد

بص يا غالي :

موضوع الوزن : الناس اللي بتطلع هي اللي وزنها زائد مش الناس النحيفه
وبرده الناس اللي عرض صدرها بيبقى رفيع او قليل وده الدكتور بيقيسه ولو انت كان عرض صدرك رفيع وفقا له يبقى ممكن يبقى ليك اعفاء
لكن بالضبط كام هو عرض الصدر اللي يطلع للجيش بصراحه معرفش للأسف

بالنسبه لموضوع النبض والقلب بص اللي اعرفه ان بيبقى فيه كشف مخصوص للنبض وضغط الدم
لما تدخل الكشف ده ابقى قول للدكتور على حالتك وغالبا بعد كده الدكتور حيكتبلك على تحويل للجنه طبيه عليا ولما تروح هناك ساعتها هما حيقرروا اذا كانت حالتك تستدعي اعفاء او انك حتبقى لائق ب
بس يا ريت لو اتحولت للجنه طبيه عليا تكون عامل اشعه تثبت موضوع العيب الخلقي في القلب عشان تثبت ليهم الموضوع ده
اتمنى اكون افدتك
بالتوفيق

غير معرف يقول...

طيب معلش سؤال تانى!!
هل لازم اخد معايا الاشعة فى الكشف الطبى الاول ولا فى اللجنة العليا بس؟
ولو اتحولت لجنة عليا ممكن اخد لائق أ ولا بتبقى لائق ب او غير لائق بس؟

admin يقول...

مش لازم تاخد الاشعه معاك في اول كشف طبي
بس لو انت كده كده عامل اشعه يفضل انك تجيبها معاك عشان دي تبقى حاجه تثبت وتسهل على الدكتور انه ياخد قرار انك تتحول للجنه الطبيه العليا
لكن لو حالتك واضحه للعين المجرده ومش محتاجه اشعه اوي يبقى عادي ممكن تستنى في الكشف الطبي لما الدكتور يكشف عليك ويحولك من نفسه للجنه الطبيه العليا

بالنسبه للجنه الطبيه العليا : ممكن تبقى لائق أ أو لائق ب أو اعفاء على حسب حالتك المرضيه

غير معرف يقول...

ياريت حد يساعدنى انا حالتى انى ولد وحيد لامى ولى اخ اكبر منى من ابى وامه مطلقة من ابى وهو خد اعفاء وحاليا انا عندى 24 خريج هندسة وابى مريض وبدون عمل ينفع انى اخد اعفاء لانى وحيد امى واعولها مع العلم انى عندى اخوات بنات بعولهم ايضا مع العلم ايضا انى اعانى من اكتائب واعالج عند دكتور نفسى انا رحت مرتين ادونى تاجيل موقت ومعادى شهر واحد 2011بارك الله فيكم افيدونى

admin يقول...

اه طبعا ينفع تاخد اعفاء طالما الوالد غير قادر على الكسب وانت العائل الاساسي للاسرة
مفيش اي مشكله وان شاء الله تاخد اعفاء عادي جدا
بالتوفيق

غير معرف يقول...

يا جماعة الخير الله يخليكم ويكرمكم
أنا عندي شررخ في الفقرة الرابعة في الضهر وانزلاق غضروفي وهعمل عملية تثبيت فقرات وعندي التهاب واختناق في عصب الكوع الايسر وهعمل عملية نقل عصب ومعاي كشوفات واشعات كتير والكشف الطبي بتاعي يوم السبت الجاي 30 /10
الكلام ده يديني معافاه من الجيش ..؟
الرجااااااااااااااء سرعة الرد الله يكرمكم

admin يقول...

اه ان شاء الله المفروض تاخد اعفاء بس ممكن في اول كشف الدكتور في منطقه التجنيد يحولك للجنه طبيه عليا في حلميه الزيتون ولما تروحلهم هناك تاخد اعفاء ان شاء الله على حسب وصفك لحالتك

غير معرف يقول...

الله يخليك يا مدير
يعني ايه على حسب وصفي لحالتي
أنا تقريبا إيدي الشمال مش شغاله مش بشيل بيها حاجه ولا بقدر افتح بيها التلاجه حتى ومعاي تقرير من المستشفى العام إني هعمل عمليتين ومكتوب فيها التشخيص وكشوفات كتير
المشكله إني تجنيد فوري لأني سحبت ورقي من الكلية بس قالولي في التجنيد لو عندك حاجه تطلعك من الجيش هتطلع المهم يعني معلش انا بتكلم كتير اكيد انت عارف حالة الشاب المصري قبل التجنيد بتبقى عامله ازاي
اوصف حالتي وصف دقيق لطبيب في منطقة التجنيد هنا ولا اعمل ايه ..؟
لو قالولي لا قدر الله لائق اعمل تظلم ولا أعمل إيه والإيه ده هعمله إزاي ..؟
الله يكرمك يا صاحب الصفحة دي يا آدمن والله إنت بتعمل خير في شباب مصر بجد يمكن إنت مش واخد بالك بس والله بتعمل فيهم خير كبير أوي
ربنا يكرمك ويسعد قلبك

admin يقول...

بص يا غالي :

لماقولتلك على حسب وصفك لحالتك كل اللي اقصده بمنتهى البساطه اني مشوفتش حاله ايدك ايه وبالتالي كل اللي بقوله بيبقى بناء على حسب وصفك
ده كان كل قصدي مش اكتر فاهمني ؟

وطالماحاله ايدك فعلا جامده كده ومش بتعرف تستعملها ومعاك تقارير كمان يبقى ان شاء الله انت اكيد اعفاء طبي

كل القصه ان احيانا اول دكتور في الكشف الطبي مبيكونش في ايده قرار انك تاخداعفاء فوري ( وده بكرر تاني احيانامش دايما ) وبالتالي هو بيحول الحاله اللي مش قادر انه ياخد فيها القرار للجنه طبيه عليا في حلميه الزيتون وهناك هما بيشوفوا حالتك ويشوفوا اذا كنت تستحق اعفاء طبي او لأ فاهمني

شوف يا سيدي انت حتروح الكشف الطبي وحتاخد معاك التقارير وحتوريها لدكتور العظام اللي في اول كشف وتشوف هو حيكتبلك ايه

لاقيتها اعفاء يبقى خير وبركه
مش اعفاء يبقى لجنه طبيه عليا وساعتها حتعمل حاجه من اتنين :

1- لو انت كنت مترشح اساسا عسكري يبقى حتعمل تظلم على طول عشان يعيدوا الكشف عليك

2- لو انت كنت مترشح ظابط يبقى حتستنى الارجه وتشوف اذا كنت تأجيل يبقى خير وبركه وحتاخد ورقه التأجيل وحتنسى قصه اللجنه الطبيه العليا

لو لا قدر الله لبست يبقى ساعتها حتروح للجنه الطبيه العليا وهناك حيكشفوا عليك ويحددوا وضعك

بس مش عايزك تقلق عشان بوصفك لحاله ايدك دي صعب جداااااااااااا انك تدخل الجيش
فان شاء الله خير
وابقى طمني بعد الكشف الطبي عملت ايه وربنا يوفقك ان شاء الله

غير معرف يقول...

ربنا يكرمك يا عمده
بجد تلاتين مليون شكر ليك ولذوقك
أنا بس ما انتهبت لما قلتلي على حسب وصف لحالتك معلش بأه التوتر بسبب الجيش إنت عارف بيعمل إيه في الشباب
أنا سيبت الكلية يعني مش ظابط التظلم الـ هو علطول ده بيتعمل داخل غرفة الكشف الطبي تقريبا ربنا يقوينا بأه ونقدر ندخل فيهم شمال وأقول لا أنا عايز أعمل تظلم قبلما أطلع بس إن شاء الله متحصلش حاجه من دي خالص واخد إعفاء من أولها
وبعد الكشف الطبي وبعد المعافاه إن شاء الله هبقى اجي أقلك غيه ال حصل واشكرك تاني
تسلم يالحبيب

غير معرف يقول...

ازززيك يا طيب
أنا رحت الكشف الطبي مبارح وكتبولي لائق ولبست وبعد بكرة ماشي لا اقتنعوا بتقرير ولا بأشعات ولا بحالتي ولا حتى رضيوا يسمعوا حسبنا الله ونعم الوكيل حسبنا الله ونعم الوكيل
وحتى لجنة طبيه عليا لأ برضه الدكتور الظالم ده قال لائق ومش محتاج لجنة طبية عليا حسبي الله ونعم الوكيل
مش عارف بقى هروح فين ولا هعمل إيه ولا إزاي أعمل هناك تظلم ولا ازاي اصلا هقدر اسافر بالحاله دي حسبي الله ونعم الوكيل

admin يقول...

لا حول ولا قوة الا بالله
انا مكنتش متوقع كده خالص
ازاي واحد مش عارف يحرك ايده ويعمل عمليه مياخدش اعفاء اوحتى يتحول للجنه طبيه عليا !!!!!!!!
ربنا معاك والله مش عارف اقولك ايه!
الحاجه الوحيده اللي باقيه انك تحاول تعمل شكوى او تظلم من منطقه التجنيد وان شاء الله خير

غير معرف يقول...

أنا متشكر لتعبك ده يا أصيل
ادعيلي حالتي النفسية سيئة جدا جدا
أنا لا بقدر أتحرك ولا اجري ولا اشيل حاجه تقيله ولا ابذل أي مجهود حسبي الله ونعم الوكيل
حهاول إن شاء الله بس معرفش أنا رايح فين ولا هعمل إيه
توقفت الحياة لفترة من الزمن أسأل الله أن يجعلها رحلة قصيرة واخد معافاه من التظلم وحسبي الله ونعم الوكيل :(

غير معرف يقول...

ياجماعه انا مواليد 88شهر سبعه يوم 29 عايز اعرف انا كده هدخل ولا لا
اصلي كنت داخل على الكشف الطبي وقالولي انتا ناقصك ورقه معادله الشهاده علشان انا دارس في السعودية وهما كانو عايزين يعرفو الشهادة دي تعادل ايه هنا في مصر المهم انا كنت داخل كشف طبي تاريخ في شهر 9 يوم 6 ولغاية دلوقتي لسه هاروح استلم الشهادة من اداره البعثات الاسبوع الجاي على كلامهم وخايف لحسن ادخل مش عارف اعمل ايه انا لو دخلت الفيزا بتاعتي هتروح عليا عايز بس حد يعرفني هدخل ولا لا مع العلم انا معايا شهاده فوق متوسط كمبيوتر
وربنا يستر حد يطمني لو يعرف حاجة

admin يقول...

بص ربنا معاك بس مفيش اي حد ابدا ممكن يعرف اذا كنت حتدخل الجيش ولا لأ
الموضوع بيعتمد لو انت مكنتش طلعت اعفاء طبي على الارجه وانت ونصيبك ممكن تخش ولا لأ فاهمني
اول ما تستلم الشهاده روح كمل باقي الاجراءات وشوف ايه النظام
للاسف مقدامكش حل تاني وربنا معاك ان شاء الله والفيزا متضيعش عليك

غير معرف يقول...

السلام عليكم انا ابعت اليك علشان حاسس انك ساندى بعد الله سبحانه و تعالى
انا حالتى انى عندى ارتجاع فى الركبتين و فلات فوت وخلع متكرر فى الكتف و معى ما يثبت ذلك من رنين و مقطعية عندى قطع فى غضروف الكتف - روحت الهايكستب فى المركز الطبى و تم تحويلى لجنة عليا وبعد الارجاء يوم 1/12 تم قبولى فى التخصاصات ك ظابط احتياط ثم ذهبت الى اللجنةة العليا تم الكشف على الارتجاع فى الركب و الدكتور قالى بتعرف تخلع كتفك قولتلو اكيد لا بس هوه بيتخلع لوحده مابصش على الاشعة و التقارير و كتبلى لائق ب دخلت بعد كده كشف اهيئة و سالونى بتشتكى من ايه قولت على الخلع مع ان الورقة كان مكتوب فيها لائق ب رمد وانا معنديش رمد .. مع العلم الدكتور فالى انا ممكن اعملك 100 اشعة رنين دلوقتى اخى هل ممكن اعمل تظلم الان ولا بعد سماع نتيجة كشف الهيئة ولا خلاص قد قضى الامر اقسم بالله انا لا اريد ان اتهرب من الجيش لو على سجن ماشى بس انا لااستطيع ان امارس اى نوع من الرياضة من فترة للام كتفى على الاخص امتنعت عن ممارسة اى رياضة وشكرااازز وشكرا على هذا الموقع الضخم الملى بالمعلومات ..

غير معرف يقول...

السلام عليكم
لو سمحت ممكن توضح موضوع الزواج من أجنبيات ؟؟
يعنى لو واحد متجوز واحدة اجنبية دا يدخل الجيش ولا لأ ؟
واى جنسية ولا بتفرق ؟
ولو هوة بيطلع من الجيش بيكتبوا اية على الاعفاء ؟عشان فى ناس بتقول بيكتبوا لدواعى أمنية ودى حاجة وحشة مش بتعرف تشتغل ولا تسافر باين !!!

admin يقول...

بص يا غالي :
انت بعد كشف الهيئه لما تطلع نتيجته ممكن تعمل تظلم لكن مش حينفع تعمل تظلم قبل ما تطلع نتيجه كشف الهيئه
وربنا معاك ان شاء الله
انا مش عارف هو الاعفاء الطبي بقى صعب كده ليه !!!
انا مستغرب جدا انك مأخدتش اعفاء بعد وصفك لموضوع الكتف ده ... ان شاء الله خير

admin يقول...

مش كل الجنسيات للزواج بتخلليك تاخد اعفاء بس للامانه معرفش كل الجنسيات اللي الزواج منهم بيطلع من الجيش

بالنسبه لشهاده الاعفاء فعلا بيكون مكتوب فيها لدواعي امنيه
ودي مبتأثرش في الشغل في حاجه لكن ممكن تضايقك شويه في المطار عند السفر عشان من الاسم لدواعي امنيه للاسف بيشمل كزا حاجه منها موضوع الزواج من اجنبيه وبرده لو كنت مثلا مسجل في امن الدوله او ليك قريب من الدرجه الاولى له جنسيه اجنبيه وهكذا فاهممني ؟
لكن برده شهاده الاعفاء دي مش حتمنعك من السفر او الشغل بأي حال من الاحوال

غير معرف يقول...

السلام عليكم و رحمة الله و بركاته
---------
أشكرك أخي العزيز على هذا الموقع المميز و على المعلومات القيمة التي تدلي بها..

لي سؤال:

عمري 32 عاماً، و موجود حالياً في السعودية، قبل سفري للسعودية حصلت على إعفاء مؤقت لأسباب عائلية، ثم استخرجت تصريح السفر و سافرت للسعودية و لم أنزل مصر..
كان مفروض عند بلوغي عمر 29 عام أن آخذ الإعفاء النهائي.. و لكن لم أتقدم لذلك لأني موجود خارج الوطن..
و انتهي جواز السفر معي و لكي أجدده من السفارة يطلبون شهادة الموقف التجنيدي..

و الآن.. كيف يكون الحل..
هل يستطيع أخي الذي معه توكيل مني (موجه لمنطقة التجنيد).. هل يستطيع أن يستخرج شهادة الإعفاء النهائي..
و هل علي محكمة .. علماً أن سبب الأعفاء لازال قائماً حتى هذه اللحظة، و هل يمكن عمل اللازم بالتوكيل دون السفر

و بارك الله فيكم
و دمت بكل خير

admin يقول...

بصراحه سؤالك صعب شويه بس غالبا بنسبه 90 % اخوك ممكن يستخرج شهاده الاعفاء النهائي ليك

بص انا وقت الارجاء بتاعتي واستلام شهاده الاعفاء المؤقت كنت بشوف امهات واباء بيستلموا الشهادات لأولادهم
فغالبا ان شاء الله حينفع يستخرج الشهاده بتاعتك طالما معاه توكيل منك الا لو لا قدر الله كانوا محتاجين يصوروك صورة جديده في شهاده الاعفاء النهائي

بص اللنك ده فيه ارقام مناطق التجنيد ممكن اخوك يتصل يتأكد بنفسه من موضوع الصورة ده اذا كان فيه ضرورة للتصوير اساسا أو لأ
http://eltagnid.blogspot.com/2009/10/blog-post_9185.html
وان شاء الله ينفع بإذن الله وابقى طمني اخوك عمل ايه

غير معرف يقول...

بارك الله فيك أخي

و سأخبرك إن شاء الله

و أسأل الله أن ييسر الأحوال و يتم ذلك على خير و يسير من الكريم الرحمن إن شاء الله

جزاك الله ألف خير

غير معرف يقول...

سلام عليكم ورحمة الله

شكرا علي هذه المعلومات الرائعة

انا مشكلتي مشكلة

اولاً انا متخلف دفعتين او اكثر عن موعدي

ولسه بدرس في الدبلوم

ثانياً عندي والدي عنده 3 قضايا
ومنهم واحدة ملف أمن دولة
قتل بالتعمد , وكان في مستشفي امراض عقلية

فهل ده يجلعني احصل علي اعفاء؟؟
ولدي 3 اخوات معاقين ذهنيناً ايضا ولكن لدي اخ اكبر مني سليم ومتزوج

انتظر ردك

admin يقول...

معلش مش فاهم يعني ايه متخلف دفعتين عن موعدك ازاي وانت لسه بتدرس في الدبلوم؟
لو انت لسه بتدرس فعلا يبقلا طبيعي انك مالكش جيش لحد ما تخلص الدبلوم

ولا انت خلصت دبلوم خلاص واتخلفت عن معاد الكشف الطبي دفعتين؟

بص انت مش حينفع تاخد اعفاء عشان ان والدك غير قادر على الكسب عشان انت عندك اخ اكبر منك
بس موضوع أمن الدوله ده ممكن ( بصراحه مش متأكد ) انه يخليك تاخد حاجه اسمها اعفاء لاسباب امنيه

انا اللي كنت بشوفه وقت الكشف الطبي انهم كانوا بيسألوا اذا كان حد عنده قريب من الدرجه الاولى عنده ملف أمن دوله بس معرفش كانوا بيعملوا معاهم ايه بمنتهى الامانه
معلش معرفتش افيدك اوي بس والله ده كل اللي اعرفه للأسف وربنا معاك

غير معرف يقول...

شكرا علي ردك واجابتك

انا متأخر في الدبلوم بمعني بغيب كتير بسبب اني بعمل فاكنت منشغل كثيرا فاكنت بعيد السنة

انا في دبلوم صناعي

فاسمعت ان مليش تأجيل حتي لو دبلوم صناعي


اما بالنسبة لأخويا متزوج وعايش لوحده وعنده أطفال

وبعده في 3 اخوات منهم 2 اولاد لكن متخلفين عقلياً بمعني لاحول ولاقوة وانا اصغرهم

ولايوجد اخوات اولاد بحالة سليمة الا انا واخي الكبير المتزوج


اذن هل معني ذلك اني لابس لابس *_*

غير معرف يقول...

السلام عليكم ورحمة الله وبركاته
أولا :بارك الله فيك ،وجزاك خير الجزاء على مجهودك الأكثر من رائع
ثانيا :إستفسار بسيط يا باشا
لو أنا دلوقتي عديت من الكشف الطبي ،فعملت تظلم وبعتوني حلمية الزيتون -في الحالة ديه- ..هل يوم الإرجاء بتاعي هيبقى نفس تاريخ يوم الإرجاء بتاع دفعتي؟
ولا؟ هيبقى يوم إرجاء تاني غير بتاع دفعتي المعملتش تظلم؟
وشكراااا.....

admin يقول...

يا باشا
انت مش حيخللوك تعمل تظلم الا لما تطلع نتيجه الارجه
انا نفسي كنت متحول للجنه طبيه عليا وكنت ممكن اطلع بعدها اعفاء لكن قالولي مش حينفع تعمل حاجه بخصوص اللجنه الطبيه العليا او حلميه الزيتون الا لما تشوف نتيجه الارجه الاول وتشوف اذا كنت حتاخد تاجيل اساسا ولا لأ فاهمني؟

فانت معاد ارجتك مش بيتغير وهو هو معادك المحدد مسبقا بعد ما تشوف نتيجه الارجه لو لبست لا قدر الله بيبقى ساعتها انت بتقدم التظلم وتشوف نتيجته
وكده كده انت مش بمجرد ما تعرف ارجتك بتترحل لسلاحك فمتقلقش بيبقى قدامك فتره عشان تقدم تظلم بعد الارجه
بالتوفيق ان شاء الله

غير معرف يقول...

وصلت المعلومة يا باشا
ربنا يباركلك يارب
طيب ممكن بس سؤال تاني
غالبا الفترة مابين الكشف الطبي و يوم الإرجاء بتبقا أد إيه(كام يوم يعني)؟
تقريبا؟

admin يقول...

بصراحه مش فاكر قوي بس هي مش حتقل بأي حال عن اسبوع على الاقل ( وانا فاكر تقريبا ان سنتي كان حوالي اسبوعين او اكتر )

غير معرف يقول...

كتر خيرك يا باشا
شكرااااا جزيلا

جزاك الله خيــــــرا يا صاحب مدونة التـجنيـدِ
تلك المدونـة المليـئة بكــــل ماهـو مفيـدِ
فكم سألنا من أسألةٍ فجاءردك مفصلا وبالتحديدِ
فكانت مدونتك بلسما لإجراءاتٍ إتسمت بالتعقيدِ
و روتيــنٍ و مـطٍ للوقـت وبعـد المـطِ تمديـدِ
وكِبر ظابطٍ يعشق تصعيب الأمور ويهيم بالتشديدِ
وعجرفة جنديٍ يوحي له غباؤه بأنه في منزلـة العقيدِ
و موظـفٌ إذا لُـقـب ،فسيلـقب حتمـا بالعنيـدِ
فلكم الله يا شباب مصرَ،ولعل هذه الثورة تأتي بالجديدِ
فلنشمر سواعدنا ولنبدأ بالبناءِ و التشييدِ
فما من شيئ و إن بدا مستحيلا ،على الله ببعيدِ

admin يقول...

شعر جااااااااااااااااامد جدا
تسلم ايدك يا غالي

silver_111 يقول...

استفسار
ياجماعة حد يدلني
انا تاريخ ميلادي 7\4\1989م حاصل على ثانوية عامة وما ازال اكمل دراستي الجامعية في الخارج ومتبهدل في موضوع إدارة البعثات والجامعة اللي بدرس فيها هتقفل وطبعا بأشتغل في الخارج وعايز اشوف حل في الجيش علماً بأني متزوج ولدي ابن ووالدي عنده 58 سنة والدتي عندها 63 سنة لدي اخوة اكبر مني غير اشفاء متزوجون واحد واخد تأجيل والتاني اعفاء نظر
وأنا وحيد والدتي
ولدي أخوة اصغر مني اطفال ايضا غير اشقاء.
طبعا مش عارف اي حاجة بخصوص الانظمة وهل فيه حل للتأجيل أو الاعفاء.
وانا كنت عامل عملية فتاق اربي ايسر.
ياجماعة اللي ليه خبرة يقولي اي حل لأني بجد مش عارف اسافر ولا اعمل حاجة وجوازي هينتهي بعد سنتين

غير معرف يقول...

انا وزنى 98 وطولى 170 لو زدت الون الى 105 اخز اعفاء مع العلم انا جسمى مشدود ليس به ترهلات لانى امارس لعبة كمال الاجسام

admin يقول...

شوف اللنك ده يا باشا
http://eltagnid.blogspot.com/2010/08/blog-post.html

ولو وزنك اعلى من 105 حتطلع وزن سواء ده كان سمنه او عضلات
بالتوفيق ان شاء الله

غير معرف يقول...

شاكر لردك اولاولكن كلامك اكيد تعرفت عليه من احد اصدفائك ويعاد الوزن متى ان تم الترشيح ظابط احتياطى

admin يقول...

مش فاهم سؤالك
يعني ايه تعرفت عليه من احد اصدقائك؟
مبدأيا انا فعلا ليا واحد صاحبي طلع من الجيش عشان وزنه زائد نصف كيلو فقط تخيل فالموضوع اكيد

ولو اترشحت ظابط احتياط ساعتها بتكشف وزن تاني في باقي الكشوفات اللي في حلميه الزيتون اللي مكتوبالك في نموذج 110 جند

غير معرف يقول...

اسف انا مش قصدى حاجه معلشى اصلى الكل قالى انك حتدخل حتى لو وزنك ايه علشان انت رياضى فعلشان قده كنت حابب اعرف المصدر وبشكرك للمرة الثانيه

admin يقول...

يا باشا مفيش حاجه
بس اصل الفكره واللي كان بيحصل قدامي ان محدش كان بيبص على العضلات القضيه كلها الواحد بيتوزن ويتقاس طوله لو وزنه اكبر من الوزن المفروض مناسب لطوله طبقا للمعادله اللي قلتلك عليها كانوا بيطلعوا جيش ده اللي كان بيحصل قدامي الا بقى لو غيروا حاجه من وقت ما كنت بكشف والله اعلم

غير معرف يقول...

يا باشا اولا شكرا علي الموقع ده وثانيا انا في الليسانس السنه دي وطبعا محدش عارف النظام بعد 25 يناير شكله ايه وفي ناس بتقول ان الارجاء اتلغت وبعدين حضرتك جبت حكايه قياس الوزن الزائد دي منين لان علي كلامك انا هاخد معافاه لان طولي 170 ووزني 114 وفي الزياده بس جسمي معقول اي نعم فيه كرش جامد شويه ومش بيخس خالص والصدر فيه ترهل وطبعا عندي التصاق بس مش عارف ازا كان يخرجني ولا لأ وعندي الاذن اليمين بايظه بس الطبله مش مثقوبه يعني سمعي ضعيف شويه وده كل الناس ملاحظاه وحجم القضيب عندي طفولي والخصيتين برده واللي قالقني ان محدش عارف الدنيا بعد 25 يناير ماشيه ازاي انا مش بحاول اهرب من خدمه وطني بس انا شايف اني ممكن اخدمه في مجالات تانيه وياريت تقولي حضرتك جبت طريقه احتساب الوزن الزايد منين بالظبط وحضرتك متأكد منها بنسبه كام % لان انا كده وزني زايد بس جسمي مش زي الجماعه بتوع الرابح الاكبر

admin يقول...

أنا سألت عن طريقه حساب الوزن هناك وهو ده كان ردهم
وان شاء الله انا متاكد بنسبه 95 % من الموضوع ده الا لو طريقه الحساب نفسها اتغيرت بعد الثورة ولاوني معتقدش انها حتتغير
ولو وزنك زائد يبقى ان شاء الله حتتطلع وزن لأن ده قانون هناك
بعد الثورة فعلا اتوقع والله اعلم ان نسبه التأجيل في الارجه حتقل كتير قوي لكن الاعفاء الطبي معتقدش انه حيبقى ليه علاقه بالثورة في النهايه المعفى طبيا هو شخص لا يصلح طبيا لدخول الجيش واشك ان الجيش حيخلليه يدخل معاه برغم حالته سواء كان فيه ثورة ولا لأ والله اعلم
بالتوفيق ان شاء الله

غير معرف يقول...

يانهار ابيض دا انا قولت لحضرتك الامراض اللي عندي وما خفي كان اعظم يعني حكايه اذني اليمين دي ماتطلعنيش دا انا مقرب اركب سماعه والالتصاق في الصيف بيبقا حاجه فظيعه وترهل الصدر ومش بقدر اجري خالص وحكايه الاعضاء التناسليه ده طوله 2 س اصلي قلقان من حكايه الوزن دي

admin يقول...

يا باشا ان شاء الله خير
انا مقدرش احكم فانت روح الكشف الطبي وقولهم على الامراض اللي عندك وان شاء الله تطلع اعفاء طبي متقلقش

غير معرف يقول...

السلام عليكم و رحمة الله وبركاته

بجد انا بشكرك كتير عن الصفحه دي لأنها بصراحه فادتني كتير بأختصار انا مواليد 24/2/1989
وميعاد جيشى فات اكيد والفتره اللي فاتنى فيها الجيش بسبب قدمت في معهد خاص و قالو هنأجلك الجيش وجيت اسئل في ميعاد دخولى قالولى لأ احنا انسحب مننا الترخيص اللي يخلينا نأجل للطلبه الجيش حورو علينا يعنى
المهم دلوقتى انا عندي اخ اكبر و تلت بنات اخوات واخويا دا متجوز و عنده اسرته و واولاده و والدى متوفى السنه اللي فاتت دي الله يرحمه فعايز اعرف هل انا لو جيت اعمل ورق الجيش و كدا اعمل كشف عيله وانى اعول اسرتي اللي هي امى و اخواتى ولا موجعش دماغى و اقدم على طول لأن ناس يقولولي هتلبس و ناس يقولولى مش هتلبس وانا عندي مليون حاجه شغل و خطوبه ووجع دماغ و موضوع الجيش دا مجننى فياريت بما انك ما شاء الله خبره في الموضوع دا تقولى هينفع انى ملبسش في الجيش ولا هلبس
وبجد تسلم لأهتمامك في مساعدة اخوانك

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB