يوم الارجه او يوم الارجاء ( اليوم اللي حيحدد مصيرك في الجيش ) داخل منطقه التجنيد

|

طبعا يوم الارجه او يوم الارجاء متهيألي حيعتبر من اهم الايام في حياتك D: اليوم اللي حيحدد مصيرك انت داخل الجيش ولا لأ ؟ انت ظابط ولا عسكري ولا تأجيل ؟

بعد ما انت خلصت كل اجراءات التجنيد وكمان خلصت الكشف الطبي في التجنيد حيبقى فاضل يا بطل يوم الارجه ( يوم الارجاء )

الاوراق المطلوب منكم انكم تجيبوها في يوم الارجه او يوم الارجاء بس هي:

1- نموذج 110

2- شهاده القيد العائلي وده مطلوب بس لو انت مكنتش جبت القيد العائلي وقت الكشف الطبي في التجنيد وكنت شغال بوصل القيد العائلي وزي ما قلتلكم ان انتم لو كنتم شغالين بوصل القيد العائلي يبقى يوم الكشف الطبي حتكتبوا اقرار على نفسكم انكم تجيبوا القيد العائلي

طيب فرضا مكانش القيد العائلي طلع يبقى ساعتها حتروح عادي يوم الارجه وتقولهم ان السجل المدني لسه مطلعلكش القيد العائلي

طيب وفعليا ايه هو اخر مدى مسموح بيه عشان تجيب القيد العائلي ؟

بصوا يوم الارجه ( يوم الارجاء ) لو كنتم تأجيل ( وان شاء الله كلكم تاخدوا تأجيل ) يبقى مش حتحتاجوا تجيبوا القيد العائلي اصلا

لكن لو لاقدر الله كنت حتدخل الجيش يبقى فيه حالتين:

1- لو كنت ظابط يبقى لااااااااااااااااااااااازم لما تروح كشف الهيئه للضباط في القاهرة يكون معاك وقتها القيد العائلي
وكشف الهيئه اساسا بيبقى بعد يوم الارجه او يوم الارجاء بحوالي كام يوم بس

2- لو كنت عسكري يبقى قبل ما تترحل لمنطقه التجنيد بتاعتك يبقى لازم يكون معاك وقتها القيد العائلي
وانا شخصيا انصحكم كده كده تحاولوا تطلعوا القيد العائلي بدري بدري بردك محدش يضمن الظروف ومين عارف لو اجلت الحوار اسبوع ولا اكتر ساعتها حيحصل ايه ؟ فاهميني ؟


2 comments:

غير معرف يقول...

طيب دلوقتي انا يوم الارجه ولبست وكنت مترشح ظابط..رحت عشان اعمل القيد العائلي فطلع في مشكله في قسيمة زواج الوالدين..اسم الام مكتوب غلط..ومعروف ان قسمة الزواج مطلوبه للقيد العائلي..فقالي الموظف هناك عشان تصلحها عايزه قضيه ومحامي وحواااااار..وانا كشف الهيئه الاسبوع الجاي..يبقى ايه العمل ..ارجوك تفيدني في الموضوع دا

admin يقول...

بصراحه مش عارف الحل ايه
الموقع ده بتاع الحكومه فيه امكانيه انك تقدم على طلب قيد عائلي او شهاده زواج من الانترنت
https://secure.cso.gov.eg/prerequest.aspx?serviceid=6

https://secure.cso.gov.eg/prerequest.aspx?serviceid=3

خش في الموقع كده وشوف اذا كان ينفع يطلعلك قيد عائلي بسرعه قبل كشف الهيئه ولا لأ
معلش انا عارف اني مفيدتكش اوي بس للاسف لا اعرف حل مباشر للمشكله بتاعتك

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB