كارت البنزين المدعم

|

الكارت الذكي او كارت البنزين المدعم هو كارت قررت الحكومه المصريه (وزاره البترول) ان كل صاحب عربيه لازم يطلعه لو عايز ياخد بنزين او سولار مدعم وده عشان تحجم وتقلل موضوع تهريب المواد البتروليه سواء بنزين او سولار او غيره فقررت تعمل كارت بنزين مدعم بحيث ان مالك الكارت يقدر لما ييجي يمون بنزين ياخد البنزين بالسعر المدعم اللي احنا متعودين عليه..

المهم بغض النظر عن القرار اذا كان حلو ولا وحش ولا حيتم تطبيقه ازاي وامتى وهل حيأثر ده علينا في الزحمه لما نيجي نمون بنزين.. انا حبيت اتكلم بس عن تجربتي الشخصيه لما طلعت الكارت ده واقولكم شويه نصايح شخصيه..

في البدايه انصح الكل انه يطلع الكارت ده لكزا سبب :

اولا لو بتفكر ان في ظل ظروف البلد دي انه ملوش لزمه تطلع الكارت واننا لو مطلعناهوش الحكومه مش حتشتغل بيه فللأسف بالفعل ناس كتير خلاص طلعته وبالتالي قرار استعمال الكارت (بغض النظر اذا كان حلو ولا وحش ) ده للأسف حيتنفذ حيتنفذ سواء اجلا او عاجلا وربنا يستر... وبالتالي من مصلحه الكل انه يطلعه من دلوقتي لأنه بياخد وقت طويل عشان يطلع عشان بيتعمل في القاهره وبعدها بيجيلك بالبريد لحد بيتك او اقرب بوسطه جنب بيتك حسب ما حقولكم كمان شويه

ثانيا دلوقتي استخراج الكارت سهل مجرد بيانات بتملاها من على موقع وبعدها بفتره الكارت بيجيلك من غير ما تدفع تقريبا اي حاجه تذكر لكن الله اعلم بعدين لو الحكومه قررت فجأه تستعمل الكارت ده ممكن اوي تلاقي صعوبه في استخراج الكارت وممكن تضطر تروح تعمل مشاوير او اجراءات عشان تعمله

ثالثا ببساطه انت مش حتخسر حاجه لما تطلعه  :)  يعني سواء الحكومه اشتغلت بيه او مشتغلتش بيه منتاش خسران حاجه لأنك تقريبا مش حتدفع حاجه ودي وجهه نظري  :)

عموما سواء قررت تطلعه دلوقتي او بعدين انا حقولكم شويه ملحوظات بسيطه لما جيت اطلع الكارت

اولا الموقع اهه       http://adf.ly/dsxz4   وده رابط مختصر بيوديك على طول للنك التسجيل على موقع الحكومه الالكترونيه لدعم وترشيد المواد البتروليه

ثانيا الموقع نفسه فيه اسئلة واجوبه كتيره عن الكارت وموضوع السعر والكميه ونوع وفئه العربيه..الخ  وده الرابط المختصر للأسئلة والاجوبه دي   http://adf.ly/dt0CA

ثالثا وفقا للموقع فالمفروض ( والله اعلم ايه اللي حيحصل بالظيط  :D )  ان  لا توجد اى تحديد للكميات و لا تغيير فى الأسعار والكروت الذكية تصدر لكافة انواع السيارات ولكافة انواع الوقود (كارت للسولار و كارت للبنزين).


رابعا بالنسبه لموضوع استلام الكارت عندكم اختيارين اما عن طريق ان الكارت ييجي لأقرب بوسطه انت تختارها جنب البيت ولما الكارت بيوصل ساعتها بيتصلو بيكم وبيقولولكم ان الكارت وصل وبتروح تستلمه ومعاه اصل وصور من البطاقه والرخص
او
انك تختار انه يجيلك على البيت على طول بس ساعتها بتدفع رسوم 20 جنيه تمن الخدمه دي

اللي انا عايز انبه عليه ان لو صاحب العربيه مش حيبقى موجود (سواء مسافر او تعبان او اي سبب تاني ) لما الكارت يطلع يفضل ساعتها انك تختار ان الكارت ييجي على البيت على طول عشان ساعتها ممكن من غير توكيل اي حد في البيت عندك يستلم الكارت عادي بمجرد الاطلاع على بيانات تثبت هويه صاحب العربيه زي الرخصه والبطاقه والصراحه اللي بيحصل عمليا على ارض الواقع ممكن اوي البوسطجي ميبصش على اي حاجه اساسا ! 
لكن
لو اخترت في الحاله دي انك تستلمها من البوسطه نفسها فحيبقى صعب جدااااااا ان اي شخص يستلم الكارت نيابه عن صاحب العربيه لو مش موجود من البوسطه ذات نفسها لأنهم مبيعترفوش حتى بتوكيل بيع واداره العربيه والموظفات هناك مبيفهموش اي حاجه اساسا !! وللتنويه لما تيجي تسجل في الموقع حتلاقي انه ممكن تختار ان مستلم الكارت ممكن يبقى شخص تاني غير صاحب العربيه بس الموظفات بتوع البوسطه مبيفهموش اي حاجه فالخلاصه لو واحد تاني حيستلم الكارت نيابه عن صاحب العربيه لأي ظروف اوعى تختار وانت بتسجل انك تستلم الكارت من البوسطه نفسها واختار انها تجيلك على البيت صحيح حتدفع 20 جنيه بس على الاقل حتعرف تاخد الكارت بدل مهو مرمي في البوسطه عشان موظفه عبقريه مش عايزه تعمل اي حاجه..

خامسا حتلاقي في الموقع انك المفروض تأكتف او تفعل الكارت عن طريق كود او رقم بيجيلك على موبايلك لكن عمليا لما استلمت الكارت مجاليش اي مسج على موبايلي ولما اتصلت بيهم قالولي انهم خلاص أكتفو او فعلو كل الكروت اللي طبعوها اول مرة

اخيرا لو عايز تعرف الرقم البريدي لأقرب بوسطه ليك ممكن تخش على الرابط ده   http://adf.ly/dt1t8   واكتب فيه منطقتك او حي سكنك حيتكتبلك الرقم البريدي
 او
ممكن برضه من الموقع ده حتلاقو كل مكتب بريد مكتوب جنبه عنوانه ورقمه البريدي   http://adf.ly/dt2Q0

 وربنا يوفقنا جميعا  :)

0 comments:

إرسال تعليق

ملحوظة: يمكن لأعضاء المدونة فقط إرسال تعليق.

 

تعريب وتطوير ابن حجر الغامدي ©2009 اجراءات التجنيد | Template Blue by TNB